Astanada alǵash ret jekemenshik balabaqshalarǵa monıtorıng júrgizildi
ASTANA. QazAqparat - Elordanyń birneshe balabaqshasynda beınebaqylaý júıesi ilki rejımde ornatyldy. Bul týraly búgin Astana qalalyq bilim basqarmasynyń basshysy Ánýar Janǵozın aıtty, dep habarlaıdy QazAqparat tilshisi.
«Birqatar balabaqshada ilki rejımde zııatkerlik beınebaqylaý júıesi engizildi. Ol memleket tarapynan qarajat salýdy qajet etpeıdi. Eń mańyzdysy ata-analar 24/7 rejıminde balalarynyń nemen aınalysyp jatqandyǵyn baqylap otyra alady», - dedi basqarma basshysy.
Onyń aıtýynsha, balabaqsha qyzmetkerleriniń ústinen túsken árbir shaǵymdy qaraý úshin arnaıy komıssııa qurylady. Onyń quramyna ata-analar, qoǵam ókilderi kiredi jáne olar sol mekemege baryp mán-jaıdy anyqtaıdy. Abyroı bolǵanda, elordada balabaqsha tárbıeshileriniń balalarǵa qol kóterý derekteri tirkelgen emes.
Sonymen qatar, ol aǵymdaǵy jyly alǵash ret memlekettik tapsyrys alatyn jekemenshik balabaqshalarǵa monıtorıng júrgizilgendigin aıtty.
«Qorytyndysynda 4 balabaqsha memlekettik tapsyrys alý múmkinshiliginen aıryldy jáne 14 mekemege eskertý jasaldy. Olar eskertpelerdi tamyz aıynyń sońyna deıin joıýy tıis. Odan keıin olarǵa memlekettik tapsyrysty uzartý máselesi sheshiletin bolady. Aǵymdaǵy jyly memlekettik tapsyrys somasy 23 myńnan 27 myńǵa deıin ulǵaıtyldy», - dedi Ánýar Janǵozın.
Basqarma basshysynyń dereginshe, sońǵy 2 jyldyń ishinde 3-6 jas aralaǵyndaǵy balalardy mektepke deıingi daıarlyqpen qamtamasyz etý kórsetkishi 70 paıyzdan 81 paıyzǵa deıin ósti.
Nátıjesinde 3 pen 6 jas aralyǵyndaǵy kezekte turǵan balalar sany 37 myńnan 24 myń balaǵa deıin tómendedi.
