Astanada alǵash ret zaǵıp balalarǵa arnalǵan top ashyldy
ASTANA. QazAqparat - Astanada №23 balabaqshada zaǵıp jáne nashar kóretin balalarǵa arnalǵan top ashyldy, dep jazady astana.gov.kz saıty.
- 2015 jyly zaǵıp balalarǵa arnalǵan balabaqshanyń qurylysy bastalady. Osyndaı erekshe qajettiligi bar balalar sany, ókinishke qaraı, jyl saıyn artyp keledi. Osyǵan baılanysty ata-analardyń ótinishterimen tıisti top ashyldy, - dedi Bilim basqarmasynyń basshysy Elmıra Sýhanberdıeva.
Toptyń ashylýy men aldaǵy ýaqytta zaǵıp balalarǵa arnalǵan balabaqshanyń salynýy olardy erekshe ádisteme boıynsha oqytýǵa múmkindik beredi. Óıtkeni, olardyń bárine damýǵa, oqýǵa jáne álemdi tanýǵa múmkindik berilýi tıis.
Qazirgi ýaqytta ınklıýzıvti bilim berýdi damytý júıesi memlekettik bilim berý saıasatynyń mańyzdy mindetteriniń biri bolyp tabylady. Elordada da buǵan basa nazar aýdarylady. Basqarmanyń málimetinshe, 47 mektep múmkindigi shekteýli balalarǵa arnaıy bilim beredi. Sonymen qatar, arnaıy mektepke deıingi mekemeler men ádettegi balabaqshalarda arnaıy toptar júmys isteıdi.
