Astanada alǵash ret «World Beauty-2016» festıvaliniń grand fınaly ótedi
ASTANA. QazAqparat - 2016 jyly 2-6 qarasha kúnderi Astana qalasy ákimdigi, Per Karden sán úıi, «Eralash» kıno-jýrnalynyń qoldaýymen «Beıbitshilik jáne kelisim saraıynda» «World beauty - 2016» Sán jáne sulýlyq festıvaliniń grand fınaly ótedi, dep habarlaıdy QazAqparat.
Festıval aıasynda Miss ı Mister (jas erekshelikteri boıynsha), Super model, Best designer, Best talent, Best make-up artist saıystary ótpek. 3-4 qarasha kúnderi konkýrstyq kúnder aıasynda qatysýshylar óz talanttary men sán jetistikterin pash etedi.
Al, 5 qarashada marapattaý sharasy ótedi. Konkýrsanttardy qazaqstandyq jáne reseılik sán úıleriniń basshylary men shyǵarmashylyq dırektorlary baǵalaıdy. «World Beauty-2016» festıvali baıqaýlarmen ǵana emes, sulýlyq ındýstrııasynyń sońǵy sán úlgilerin pash etetindigimen de tanymal. Kelisti boıjetkender, ásem kóılekter, kózdiń jaýyn alatyn buıymdar, sán áleminiń talǵampaz qonaqtary - barlyǵy festıval aıasynda bolady.
«World Beauty-2016» byltyr Vetnamda ótken edi, bıyl bul mártebege Qazaqstan qol jetkizdi. Aıta ketý kerek, festıvaldiń grand fınalyn ótkizýge Reseı, Italııa, Nıý-Iork ótinish bergen. Kileń myqtynyń ishinen Astana osy festıvaldi qabyldaýǵa laıyq dep tanyldy. Festıvalge qatysý úshin álemniń 20 memleketinen dızaınerler keledi dep kútilýde.
«Bıyl biz «sándi astanalyq garderobqa» arnalǵan qyzyqty sheshimderdi erekshe kútip otyrmyz, bizdi álemniń ár túkpirinen kelgen dızaınerler tańdaı qaqtyrady dep senemiz. Árıne, kórmeniń shyǵarmashylyq aýqymy tek bizdiń qalamen, bizdiń elmen shektelmeıdi, shara kezinde sizder álemdik sán óneriniń jańa aǵymdarynan qanyǵa alasyzdar. Qazir ne sándi, ne ádemi degen suraqqa jaýap izdep júrgen talǵampaz jandar «World Beauty-2016» sán jáne sulýlyq festıvaliniń grand fınalyna kelińizder», - deıdi atalmysh festıvaldiń uıymdastyrýshysy - «Іńkár sezim» Etno Stýdııasynyń basshysy Gúlnár Júnisova.
