Astanada alǵash ret Volonterler saıabaǵy ashylady
ASTANA. KAZINFORM – Astanada volonterlik qozǵalysty qoldaýǵa baǵyttalǵan birqatar jańa joba júzege asyrylmaq. Sonyń aıasynda elordada alǵash ret Volonterler saıabaǵyn ashý josparlanyp otyr. Bul týraly Astana qalasy Kommýnıkatsııalar qyzmetinde ótken baspasóz májilisinde qalasy ákimdiginiń «Astana jastary» KMM basshysy Shyńǵys Tileýlın aıtty.
Onyń aıtýynsha, skverdi Saryarqa aýdanynda ashý usynylyp otyr.
– Qazirgi ýaqytta saıabaqty Saryarqa aýdanynda ashý múmkindigi qarastyrylyp jatyr. Sebebi bul aýdanda volonterlik uıymdar kóbirek shoǵyrlanǵan, - dedi spıker.
Sondaı-aq ol Volonterlerdiń halyqaralyq jyly aıasynda elordada dástúrli «Volunteer Fest» festıvali ótetinin aıtty. Іs-shara 5 jeltoqsanda atap ótiletin Halyqaralyq volonterler kúnine oraı uıymdastyrylady.
Onyń aıtýynsha, jyl saıyn «Astana jastarynyń» eriktileri 150-ge jýyq qalalyq jáne halyqaralyq is-sharaǵa qatysyp, Qazaqstanda eriktilik mádenıetin damytýǵa úles qosyp keledi.
– Máselen, 2025–2026 jyldary eriktilerdiń qatysýymen BizBirgemiz, «Qaýipsiz qala», «Qamqorlyq mekenjaılary», Taza Alem, Stop Vandal jáne basqa da jobalar aıasynda 1200-den astam is-shara uıymdastyryldy. Eriktiler muqtaj jandarǵa azyq-túlik pen ystyq tamaq jetkizýge, aýlalardy qardan tazartýǵa, ekologııalyq aktsııalar ótkizýge, quqyq buzýshylyqtyń aldyn alý sharalaryna qatysyp, tyıym salynǵan zattardyń jarnamalaryn joıý jáne turǵyndarǵa qaýipsizdik máseleleri boıynsha túsindirý jumystaryn júrgizýge atsalysty, - dedi Shyńǵys Tileýlın.
Eske salaıyq, Memleket basshysy Qasym-Jomart Toqaevtyń bastamasymen BUU Bas Assambleıasy 2026 jyldy Volonterlerdiń halyqaralyq jyly dep jarııalaǵan bolatyn.
