Astanada alǵash ret ulttyq sport kúni atap ótildi
ASTANA. KAZINFORM - Búgin elordadaǵy «Arǵymaq» at-sporttyq saýyqtyrý kesheninde Naýryz meıramy aıasynda Ulttyq sport kúnine arnalǵan «NAÝRYZNAMA: Ulttyq sport kúni» atty merekelik is-shara ótti.
Atalǵan is-sharaǵa Týrızm jáne sport mınıstri Ermek Marjyqpaev, Astana qalasy ákiminiń orynbasary Eset Baıken, Ulttyq sport qaýymdastyǵynyń prezıdenti Islambek Saljanov, ulttyq sport ardagerleri, ulttyq sport federatsııalarynyń prezıdentteri, sportshylar, dıplomatııalyq mıssııalardyń basshylary men ókilderi, sondaı-aq elorda turǵyndary men qonaqtary qatysty.
Týrızm jáne sport mınıstri Ermek Marjyqpaev quttyqtaý sózinde elimizde ulttyq sport túrlerine degen qyzyǵýshylyq pen suranys artyp kele jatqanyn erekshe atap ótti.
«Qazaqtyń ulttyq oıyndary – mádenı-patrıottyq tárbıe berýde utymdy qural. Densaýlyqty nyǵaıtýǵa, salamatty ómir saltyn nasıhattaýǵa eleýli septigin tıgizedi. Búgin el ishinde ótkizilip jatqan at jarystar, qusbegilik jáne asyq atý, toǵyzqumalaq, sadaq atý sııaqty týrnırler azamattarǵa shynaıy merekeni sezinýge múmkindik berýde» - dedi mınıstr.
Óz kezeginde Ulttyq sport túrleri qaýymdastyǵynyń prezıdenti Islambek Saljanov elimizde Naýryz meıramyn toılaýdyń jańa tujyrymdamasy aıasynda 20 naýryzdyń ulttyq sportqa arnalýy búkil ulttyq sport úshin qýanyshty jańalyq ekenin aıtty.
«Keıingi jyldary Memleket basshysy Qasym-Jomart Toqaevtyń qoldaýymen elimizde ulttyq sport qarqyndy damyp keledi. Bıyl qyrkúıek aıynda elordada Prezıdenttiń bastamasymen 5-shi Dúnıejúzilik kóshpendiler oıyndary ótedi. Bul aýqymdy halyqaralyq is-shara ulttyq sportty odan ári damytýǵa tyń serpin beredi» - dedi Islambek Saljanov.
Astana qalasy ákiminiń orynbasary Eset Baıken «Arǵymaq» at-sporttyq saýyqtyrý keshenine jınalǵan qaýymdy meırammen quttyqtap, mereke kúnderi elordanyń barlyq aýdanynda ulttyq sport túrleri boıynsha jarystar ótetinin jetkizdi.
Merekelik is-shara aıasynda kókpar, aýdaryspaq, teńge ilý, qyz qýýdan kórsetilimder jáne toǵyzqumalaq pen asyq atýdan sheberlik synyptary uıymdastyryldy. Qonaqtarǵa qazaqy tazy jáne búrkit kórsetilip, qusbegilik óner tanystyryldy.
Sonymen qatar kókpardan Astana men AQSh quramalary arasyndaǵy joldastyq kezdesý kórermender úshin keremet tosynsyı boldy.
Meıramǵa oraı óziniń jetistikterimen ulttyq sportty dáriptep júrgen ulttyq sport ardagerleri men qaıratkerler marapattaldy. Olardyń qatarynda kókpardan KSRO-nyń toǵyz dúrkin chempıony Ábilhan Daýylbaev, toǵyzqumalaqtan eki dúrkin el chempıony Meıramqul Noǵaıbaev, Qazaq KSR eńbek sińirgen jattyqtyrýshysy Jumabek Meıramǵalıev, belgili sport jýrnalısi, jazýshy Nesip Júnisbaıuly, eńbek sińirgen jattyqtyrýshy Qulamhan Jaqypov, asyq atýdan ulttyq quramanyń bas bapkeri Jomart Sabyrjanov, atbegi Meırambek Chakenov bar.
«Ulttyq sport ardageri retinde eńbegimizdi elep, marapattap jatqanyna qýanyshtymyz. Qazir elimizdegi jas sportshylarǵa múmkindik kóp. Aldaǵy 5-shi Dúnıejúzilik kóshpendiler oıyndarynda ulttyq quramamyzǵa jeńis tileımin», - dedi Ábilhan Daýylbaev.
Aıta keteıik, Ulttyq sport qaýymdastyǵynyń quramyna búginde 10 federatsııa kiredi. Olar: báıge, kókpar, aýdaryspaq, sadaq atý, jamby atý, teńge ilý, qusbegilik, asyq atý, «JORYQ» jáne t.b. Ótken jyly federatsııa sportshylary 12 halyqaralyq jarysqa qatysyp, 95 medal jeńip aldy, onyń 35-i – altyn.