Astanada alǵash ret til forýmy ótedi

NUR-SULTAN. QazAqparat – Nur-Sultan qalasynda alǵash ret 24 qazanda «Jahandaný jáne ulttaný úderisindegi qazaq tiliniń ómirsheńdigi» atty til forýmy ótedi. QR Mádenıet jáne sport mınıstrligi Til saıasaty komıteti Sh.Shaıahmetov atyndaǵy «Til-Qazyna» ulttyq ǵylymı-praktıkalyq ortalyǵynyń uıymdastyrýymen ótetin forýmǵa zań, bıznes, bilim, ǵylym jáne BAQ salasynyń ókilderi qatysyp, onda latyngrafıkaly jańa álipbı negizinde qazaq tilin jańǵyrtýdyń ózekti máseleleri talqylanbaq. Bul týraly QazAqparat ortalyqtyń baspasóz qyzmetine silteme jasap habarlaıdy.

Sharanyń negizgi maqsaty jańa álipbı negizinde jańǵyrǵan qazaq tiliniń qazirgi zaman suranysyna saı ómirsheńdigin arttyrý joldaryn anyqtaý bolyp otyr. Bul rette Qazaqstan Respýblıkasyndaǵy kez kelgen zań jobalaý jumystarynyń mátinin aldymen memlekettik tilde ázirleýdi uıymdastyrý, bıznesti qazaqshalandyrý, bilim berý júıesin latyn álipbıine kóshirý, ǵylymdaǵy qazaq tiliniń qoldanysyn keńeıtý, sapasyn arttyrý, BAQ-taǵy qazaqtildi kontent sapasyn arttyrý, jastar arasynda qazaq tilin brendke aınaldyrý máseleleri qozǵalady.

Forým barysynda, sondaı-aq jańa álipbı men qazaq tilin ońaı ári tıimdi jolmen úıretetin zamanaýı ınteraktıvti quraldardyń kórmesi ótedi. Munda «Til-Qazyna» ortalyǵy ázirlegen jańa ІT-jobalar tanystyrylyp, kópshiliktiń qoldanylýyna usynylady.

Budan bólek, forým aıasynda 6 sektsııa boıynsha jumys jasaıtyn ǵylymı konferentsııa ótkizilip, Nur-Sultan, Almaty, Shymkent qalalary men 14 óńirdegi tildik ahýaldy jaqsartý boıynsha úılesimdi jumysty josparlaýǵa arnalǵan óńirlik Til basqarmalarynyń basqosýy uıymdastyrylady.

«Іs-sharanyń nátıjesinde jańa álipbı emlesine qatysty jurt kókeıinde júrgen saýaldarǵa naqty jaýap beriledi. Memlekettik tildiń zańnamasyn jetildirý, bıznes, ǵylym, bilim, BAQ-taǵy qazaq tiliniń qoldanysyn keńeıtýge, mádenıetin arttyrýǵa qatysty naqty usynystar kórsetilgen qarar qabyldanyp, jaýapty quzyrly organdarǵa jiberiledi», - delingen baspasóz baıanynda.