Astanada alǵash ret para ústel tennısinen «ITTF fa20 Astana para open 2024» halyqaralyq týrnıri ótedi
ASTANA. KAZINFORM – Elordada alǵash ret para ústel tennısinen «ITTF fa20 Astana para open 2024» halyqaralyq týrnıri ótedi. Baıraqty báseke naýryz aıynyń 1-3 aralyǵynda Astanadaǵy «add Table Tennis Center Astana» (Qabanbaı batyr dańǵyly 47/1) ústel tennısi ortalyǵynda ótpek.
Halyqaralyq týrnırge 19 elden 150-ge jýyq parasportshy qatysady dep josparlanýda. Aıtýly dodada el namysyn Astana qalasynyń para sportshylary da qorǵaıdy. Atap aıtqanda, elordalyq Sáýle Aıdarhanova, Balzııa Tash, Aleksandra Stepanova, Altynaı Erjanqyzy, Gúlmıra Qaıdasova, Jaqypbek Raıymbek, Janna Alıeva, Rınat Gılfanov jáne Danıl Nıkıtın qatysady.
Ústel tennısinen Astana qalasynyń aǵa jattyqtyrýshy Gennadıı Gerrasımenko Halyqaralyq týrnırge sportshylardyń daıyndyǵy qarqyndy ekenin atap ótti.
«ITTF Fa20 Astana para open 2024-halyqaralyq reıtıngte oryn alýǵa, sondaı-aq halyqaralyq klassıfıkatsııasy joq sportshylar úshin halyqaralyq klassıfıkatsııa alýǵa tamasha múmkindik. Ústel tennısinde múgedektik tobyna baılanysty sportshylarǵa halyqaralyq dáreje de beriledi. Halyqaralyq synypqa ıe bola otyryp, sportshy osy synypta halyqaralyq jarystarda óner kórsete alady. Mysaly, arbadaǵy sportshylarǵa 1-5 klass , tirek - qımyl apparaty zaqymdanǵan sportshylarǵa 6-10 klass, ıntellıktýaldy múmkindikteri shekteýli sportshylarǵa 11 klass beriledi (onyń ishinde basqa sanattarǵa bólinedi). Bul týrnırge bizdiń sportshylar alty aı boıy daıyndaldy. Biz kúndelikti jattyǵýǵa 3 saǵat ýaqyt bólemiz, sonymen qatar jalpy dene shynyqtyrýǵa erekshe nazar aýdaramyz. Jattyǵý kezinde ár sportshyǵa jeke oıyn ádisi men tehnıkasy jasalady. Bizdiń elimizde halyqaralyq jarystar ótip jatqanyna óte qýanyshtymyn. Bizdiń sportshylar jaqsy nátıjelerge qol jetkizetinine senimdimin" -deıdi ol.
Aıta keteıik, halyqaralyq týrnır tirek–qımyl apparaty zaqymdanǵan sportshylar arasynda, sondaı-aq ıntellıktýaldy múmkindikteri shekteýi sportshylar arasynda ótkiziledi.
