Astanada alǵash ret Nartaı Bekejanov atyndaǵy respýblıkalyq ánshi-jyrshylar baıqaýy ótedi
ASTANA. 18 mamyr. QazAqparat - 19-20 mamyr kúnderi Astana qalasynda Qazaq Ulttyq óner ýnıversıtetiniń «Shabyt» kontserttik zalynda «Ózderiń biler - Nartaımyn!» atty respýblıkalyq ánshi, jyrshylar konkýrsy ótedi, dep habarlaıdy QR Mádenıet jáne aqparat mınıstrliginiń baspasóz qyzmeti.
Konkýrs Qazaqstan Respýblıkasynyń Prezıdenti N.Á.Nazarbaevtyń bastamasymen dúnıege kelgen «Mádenı mura» Memlekettik baǵdarlamasy aıasynda jáne «Astana - túrki áleminiń astanasy» bolyp jarııalanýyna oraı uıymdastyrylyp ótkiziledi.
Atalmysh sharany ótkizýdegi basty maqsat - XX ǵ. qazaq óneri men mádenıetiniń asa kórnekti ókili, ánshi, jyrshy, aqyn, sazger Nartaı Bekejanulynyń (1890-1954) shyǵarmashylyǵyn nasıhattaý, jas urpaqtyń Ulttyq dástúrli ónerge degen ynta-yqylasyn oıatý jáne Nartaı Bekejanulynyń shyǵarmashylyq tulǵasyn jańa qyrynan tanýǵa jol ashý.
Konkýrstyq baǵdarlamanyń talabyna sáıkes árbir qatysýshy Nartaı Bekejanulynyń 6 áni men shyǵarmasyn oryndaýy tıis. Nartaı Bekejanulynyń zamandastary: Taıjan, Shashýbaı, Maıra, Kenen aqynnyń ozyq án úlgilerin syrnaı men dombyrada oryndaý konkýrs talaptaryna saı teń dárejede baǵalanady.
19 mamyr kúni tańǵy saǵat 9.30 Qazaq Ulttyq óner ýnıversıtetiniń «Shopen» zalynda buqaralyq aqparat quraldary ókilderi úshin arnaıy konkýrsqa qatysýshylar men uıymdastyrýshylar, qazylar alqasy músheleriniń qatysýymen baspasóz máslıhaty ótedi.
Konkýrstyń sońynda jeńimpazdardyń qatysýymen Gala-kontsert uıymdastyrylady.
