Astanada alǵash ret Nartaı Bekejanov atyndaǵy respýblıkalyq ánshi-jyrshylar baıqaýy ótedi
ASTANA. 16 mamyr. QazAqparat - Mamyrdyń 19-20-sy kúnderi Astana qalasynda Qazaq Ulttyq óner ýnıversıtetiniń «Shabyt» kontserttik zalynda «Ózderiń biler - Nartaımyn!» atty respýblıkalyq ánshi, jyrshylar konkýrsy ótedi.
QR Mádenıet jáne aqparat mınıstriligi baspasóz qyzmetiniń málimetinshe, baıqaý Qazaqstan Respýblıkasynyń Prezıdenti N.Á.Nazarbaevtyń bastamasymen dúnıege kelgen «Mádenı mura» Memlekettik baǵdarlamasy aıasynda jáne «Astana - túrki áleminiń astanasy» bolyp jarııalanýyna oraı uıymdastyrylyp ótkiziledi.
Atalmysh sharany ótkizýdegi basty maqsat - XX ǵ. qazaq óneri men mádenıetiniń asa kórnekti ókili, ánshi, jyrshy, aqyn, sazger Nartaı Bekejanulynyń (1890-1954) shyǵarmashylyǵyn nasıhattaý, jas urpaqtyń Ulttyq dástúrli ónerge degen ynta-yqylasyn oıatý jáne Nartaı Bekejanulynyń shyǵarmashylyq tulǵasyn jańa qyrynan tanýǵa jol ashý.
Baıqaý baǵdarlamasynyń talabyna sáıkes árbir qatysýshy Nartaı Bekejanulynyń 6 áni men shyǵarmasyn oryndaýy tıis. Nartaı Bekejanulynyń zamandastary: Taıjan, Shashýbaı, Maıra, Kenen aqynnyń ozyq án úlgilerin syrnaı men dombyrada oryndaý konkýrs talaptaryna saı teń dárejede baǵalanady.
Konkýrstyń sońynda jeńimpazdardyń qatysýymen Gala-kontsert uıymdastyrylady.
