Astanada alǵash ret «muz gladıatorlary» jarysy ótedi
ASTANA. QazAqparat - Qazaqstannyń astanasy alǵash ret «muz gladıatorlary» jarysyn ótkizedi, dep habarlaıdy QazAqparat Elorda Info-ǵa silteme jasap.
Qazaqstannyń Avtomotosport federatsııasy Astanada 2018 jyly Muz ústindegi spıdveıden halyqaralyq mototsıkl federatsııasy (FIM) tarapynan jekeleı álem chempıonatynyń 1-shi fınalyn ótkizýge daıyndyq jumystaryn júrgizedi.
Atalmysh jarys 2018 jyldyń 3-4 aqpanynda elordadaǵy Alaýdyń muz saraıynda ótedi. Aıta keterligi, 2018 jylǵy maýsymnyń alǵashqy bes fınalynyń birinshi kezeńin Qazaqstannyń astanasynda ótkizýdi senip tapsyrdy. Al qalǵan basqa fınaldar dástúrli túrde Reseıde, Gollandııada jáne Germanııada ótedi.
Aıta ketý kerek, Qazaqstan muz ústindegi spıdveıden jekeleı álem chempıonatynyń kezeńderin ótkizýde kóp tájirıbe jınaqtady. Atap aıtqanda, sońǵy úsh jylda Almatydaǵy «Medeý» jasandy muz aıdynynda jarys ótti.
Astanadaǵy Alaý muz saraıynda álemdik deńgeıdegi jarystar ótkizý boıynsha daıyndyq jumystary júrgizildi. Halyqaralyq mototsıkl federatsııasynyń (FIM) arnaıy komıssııasy jekeleı álem chempıonatynyń fınalyna arnalǵan arenany jáne barlyq qajetti ınfraqurylymdy tekserdi. Komıssııa jetekshisi daıyndyq deńgeıi FIM talabyna sáıkes ekenin jáne federatsııa ókilderi osy kezeńde qazaqstandyq uıymdastyrýshylardyń jumysyna qanaǵattanǵanyn atap ótti.
«Astana jarystarymyzdy alǵash ret ótkizgeli jatyr, - dep atap ótti FIM Halyqaralyq mototsıkldik federatsııasynyń trassalyq komıssııasynyń dırektory Armando Kastanıa. - Aıtý kerek, sońǵy jyldary Qazaqstannyń astanasy iri halyqaralyq is-sharalardy, sonyń ishinde sporttyq jarystardy ótkizýde mol tájirıbe jınaqtady.
Qazaqstan Respýblıkasynyń Avtomotosport federatsııasy Almatydaǵy «Medeý» muz aıdynynda bizdiń jarystarymyzdyń úsh tabysty fınalyna ıe boldy jáne Astanadaǵy jarys joǵary deńgeıde ótetinine senimdimiz. Biz Astanadaǵy jarystarǵa daıyndyq durys baǵytta júrip jatqanyna kózimiz jetti. Stadıon barlyq qajetti talaptarǵa jaýap beredi».
Qazaqstandyq uıymdastyrýshylar Astanada ótetin muz gladıatorlarynyń jarystaryna kórermenderdiń úlken qyzyǵýshylyǵy bolatynyn aıtyp otyr. Óıtkeni bul jarystyń fýtboldan nemese hokkeıden kem túspeıtinin aıtady.
«Astanadaǵy eń jaqsy muz aıdynynda uıymdastyrylyp otyrǵan álem chempıonatynyń jarysy kórermenderdiń asa qyzyǵýshylyǵymen ótedi dep esepteımiz, - degen QR Avtomotosport federatsııasynyń prezıdenti Marat Ábiqaev. - Medeýde ótken úsh jyldyq jarystyń qorytyndysy boıynsha Astanadaǵy ótkeli jatqan álemdik chempıonattyń aqtyq kezeńderiniń jalǵasynyń ótýi - Qazaqstannyń osy deńgeıdegi jarystar ótkizip, Halyqaralyq mototsıkl federatsııasy FIM tarapynan senimge ıe bolǵandyǵynyń dáleli. Bul bedeldi jarystyń bizdiń elordada óziniń jıyrmasynshy jyldyǵynda ótkiziletindigine maqtanamyz».
Sonymen qatar, 2018 jyly ótetin muz ústindegi spıdveıden álem chempıonaty bes kezeńde ótkiziledi. Birinshi jáne eń bedeldi júldeler Astana qalasynda ótedi, sodan keıin Reseı Federatsııasy, Germanııa jáne Nıderlandyda bastalady. Komandalyq álem chempıonaty 2018 jyly Reseıdiń Shadrınsk qalasynda ótedi.
