Astanada alǵash ret kitap festıvali ótip jatyr
«Búgin Astana qalasynda birinshi ret Kitap festıvali ótip jatyr. Qazaqstan Respýblıkasynyń Ulttyq akademııalyq kitaphanasy osy bastamany qolǵa alyp otyr. Birinshi kitap festıvali elimizdegi tórt mereıtoıǵa - Qazaq handyǵynyń 550 jyldyǵyna, Ata zańymyzdyń 20 jyldyǵyna, Jeńistiń 70 jyldyǵyna jáne Qazaqstan halqy Assambleıasynyń 20 jyldyǵyna arnalǵan. Degenmen, Kitap festıvalin ótkizýdegi eń túpki maqsatymyz - kitap oqýǵa tartý arqyly jas urpaqty adamgershilikke tárbıeleý. Sondyqtan, búgingi kitap festıvalin erekshe formada ótkizip jatyrmyz. Festıval aıasynda «Kitap tartý» aktsııasy, «Poezııa marafony», aqyn-jazýshylarmen kezdesý sııaqty birneshe sharalar qarastyrylǵan»,-deıdi Ulttyq akademııalyq kitaphanasy Qorlardy qurý qyzmetiniń jetekshisi Qaıyrhen Nuralıevna. Al, Ulttyq akademııalyq kitaphana dırektorynyń aıtýynsha, bul shara jastar men oqýshylardyń kitapqa degen yntasyn oıatady. «Qala ortalyǵynda, ashyq aspan astynda kitap festıvalin uıymdastyra otyryp, elimizdiń jetistikterin, aqyn-jazýshylarymyzdyń jańa shyǵarmalaryn nasıhattaýdy maqsat tutyp otyrmyz. Jalpy, biraz jyldan beri «qazaq kitabynyń oqyrmany bar ma, joq pa, degen talas bolatyn. Osy rette, Ulttyq akademııalyq kitaphanaǵa keletin oqyrmandarynyń sany bir jylda 120 paıyzǵa artty, bul - búgingi oqyrman yntaly ekenin kórsetedi. Bizdiń kitaphananyń qorynda 1 mln 500 myń kitap bar»,-deıdi Ulttyq akademııalyq kitaphana dırektory Úmithan Muńalbaeva.
