Astanada alǵash ret bochchadan Álem kýboginiń kezeńi ótip jatyr
ASTANA. KAZINFORM – 1–9 maýsym kúnderi elordada alǵash ret bochchadan Astana 2026 World Boccia Cup halyqaralyq týrnıri ótip jatyr. Jarys resmı reıtıngtik básekeler qataryna kiretin Álem kýbogi kezeńderiniń biri.
Týrnırge álemniń 24 elinen, sonyń ishinde Brazılııa, Kanada, Qytaı, Ulybrıtanııa, Ońtústik Koreıa, Frantsııa jáne Portýgalııadan kelgen 90-ǵa jýyq sportshy qatysyp jatyr.
Týrnırdiń ashylý saltanatyna Bochcha federatsııasynyń prezıdenti Máýlen Áshimbaev, Halyqaralyq bochcha federatsııasynyń prezıdenti Djonatan Morgan jáne Týrızm jáne sport mınıstri Erbol Myrzabosynov qatysty.
Mundaı deńgeıdegi jarystyń Qazaqstanda ótýi eldiń sporttyq is-sharalardy uıymdastyrý áleýetiniń joǵary ekenin kórsetip, ınklıýzıvti sportty keńinen nasıhattaýǵa qosymsha múmkindik beredi.
Álem kýbogi kezeńinde Qazaqstan quramasy sapynda 10 sportshy óner kórsetip jatyr. Olardyń úsheýi — qozǵalys múmkindigi eń shekteýli BC3 sanatyndaǵy sportshylar. Olar dopty arnaıy naýa arqyly baǵyttap, jarys barysynda kómekshileriniń qoldaýymen qatysady. Saıystar jeke, juptyq jáne komandalyq formatta ótedi.
Otandyq parasportshylardy daıarlaý jáne oqý-jattyǵý jıyndaryn ótkizý maqsatynda Portýgalııadan bapker Roberto Mateýsh shaqyryldy. Ol sportshylarmen jumys istep, aldaǵy halyqaralyq jarystar qarsańynda komandanyń tehnıkalyq jáne taktıkalyq daıyndyǵyna erekshe kóńil bóledi.
Týrnır Týrızm jáne sport mınıstrligi men seriktes uıymdardyń qoldaýymen ótip jatyr.
Sondaı-aq osy kúni Senat tóraǵasy men Halyqaralyq bochcha federatsııasynyń prezıdenti Djonatan Morgan arasynda ekijaqty kezdesý ótti. Kezdesý barysynda taraptar paralımpıadalyq sporttyń qazirgi jaı-kúıi men damý áleýeti, Qazaqstanda bochchany damytý jáne tanymal etý máselelerin, halyqaralyq yntymaqtastyqty nyǵaıtýdy, sondaı-aq sportshylar men bapkerlerdi iri halyqaralyq jarystarǵa daıyndaý baǵyttaryn talqylady.
Djonatan Morgan Qazaqstannyń ashyq ári yntymaqtastyqqa baǵyttalǵan ustanymyn joǵary baǵalap, Halyqaralyq federatsııa ınklıýzııany damytýǵa baǵyttalǵan birlesken bastamalardy qoldaýǵa daıyn ekenin atap ótti.
Aıta ketelik baıdarka men kanoede eskek esýden Azııa chempıonaty: Ulttyq quramanyń tizimi jarııalanǵan edi.
