Astanada alǵash ret baýyrdy almastyryp salý operatsııasy jasaldy
ASTANA. 26 aqpan. QazAqparat - Ótken aptada Astanada №1 aýrýhananyń mamandary Máskeýdiń N.V.Sklıfosovskıı atyndaǵy Jedel járdem ǴZI dárigerlerimen birlesip, alǵash ret baýyrdy almastyryp salý boıynsha operatsııany jasady.
55 jastaǵy emdelýshiniń donory - óziniń týǵan balasy. Qazirgi kezde ana men balanyń jaǵdaıy jaqsy. Bul týraly Astana ákimdiginiń resmı saıty habarlady.
2011 jyly emdelýshi gepatologtyń qabyldaýynda bolǵanda, oǵan baýyrdyń bastapqy bılıarly tsırrozy dıagnozy qoıyldy. Naýqastyń ómirin saqtap qalý úshin onyń baýyryn almastyrýdan basqa amal qalmaǵan. №1 qalalyq aýrýhananyń mamandary N.V.Sklıfosovskıı atyndaǵy Jedel járdem ǴZI dárigerlerimen birlesip ota jasaýǵa bel býdy.
Qazirgi kezde mundaı operatsııaǵa myńnan astam qazaqstandyq muqtaj. Qazaqstanda birqatar sebepterge baılanysty, aǵzany almastyryp salý otalary kenjelep tur. Sondyqtan, aýrýlardyń basym bóligi shet elderge jiberiledi. Bir aıta keterligi, «Salamatty Qazaqstan» densaýlyq saqtaýdy damytýdyń memlekettik baǵdarlamasy iske asyrylǵaly, otandyq medıtsına josparly túrde mamandandyrylǵan medıtsınalyq kómekti damytyp keledi. Keshe ǵana múmkin emesteı bolyp kóringen ishki organdardy aýystyryp salý operatsııasy bul kúnderi edáýir qarqyn alyp keledi.
Baýyrdy almastyryp salý otasy Respýblıkamyzda segizinshi ret, al Astanada alǵash ret jasaldy.
