Astanada alǵash ret balalar sán kórsetilimi ótti
ASTANA. QazAqparat - Astanada alǵash ret Kazakhstan kids fashion show 2015 eksklıýzıvti balalar sán úlgisiniń kórsetilimi ótti. Oǵan otandyq sángerler men Qazaqstan sán álemindegi jańa esimder, sonymen birge batys fotograftary, dızaınerleri men sángerler qatysty.
Balalar sán alańy «Dýman Okeanarıým» oıyn-saýyq ortalyǵynda uıymdastyryldy, onda teatrlandyrylǵan qoıylymdarmen taqyryptyq kórsetilimder boldy. Oǵan barsha Qazaqstannan 100-den astam bala qatysty. Sángerlermen jumysqa horeograftar, qoıýshy rejısserler, jýrnalıster, fotograftar, operatorlar qatysty.
Munda óz týyndylaryn I ranni, Catreen Design, Slt&Zm, Asella, Bibisara, KARO MELI, Viva, Dina Lee,Hey baby sán úıleriniń, Áıgerim Qaırat, Aıym Aıbatyr, SAMIDEL jáne Italııadan kelgen arnaıy qonaq - Ekaterına Ivankova kópshilik nazaryna usyndy.
Arnaıy, uıymdastyrýshylardyń shaqyrtýy boıynsha Astanaǵa birneshe kúnge Bıbisara Sháripova keldi. Ol mundaı sharaǵa tuńǵysh ret qatysyp otyrǵanyn aıtty.
«Men eshqashan da balalardyń sán kórsetilimine qatysyp kórmeppin. Bul meniń alǵashqy tájirıbem. Maǵan bizdiń dızaınerlerdiń kishkentaı búldirshinder úshin qandaı kıimder úlgilerin oılap taba alatyny óte qyzyq», - dedi jýrnalısterge bergen suhbatynda B.Sháripova.
Ol model bıznesinde 15 jyldan beri eńbek etip keledi. Stepnogorsk qalasynda týyp-ósken. Búginde suranysqa ıe manekenshiler tizimine kirip, álemdik podıýmdy jaýlady. Nıý-Iork, Mılan, Parıj, Tokıo, Bangkok, Gonkong, Sıngapýr sııaqty qalalarda Joǵary sán úlgisi aptalyǵyna qatysqan.
Al Qazaqstan týmasy, dızaıner Ekaterına Ivankova Kazakhstan kids fashion show-da jarqyn tústi balalar kıim kollektsııasyn usyndy.
«Bul meniń alǵashqy kollektsııam, buǵan deıin balalarǵa kıim úlgilerin ázirlemegen edim. Bul kollektsııamdy úsh aı boıy daıyndadym. Meni Ortalyq Azııanyń elderi, onyń keń dalalarynda ómir súrip jatqan adamdar shabyttandyrdy. Men balalardyń kıimderine sál eresektik sıpat berýge tyrystym», - deıdi modeler.
