Astanada alǵash ret balaǵa baýyr aýystyryp salý otasy jasaldy
ASTANA. 1 qarasha. QazAqparat - Astanada Respýblıkalyq jedel medıtsınalyq járdem ǵylymı ortalyǵynyń bazasynda balaǵa tiri donordan baýyr aýystyryp salý otasy jasaldy. Bul týraly astana.kz saıtyna atalǵan vedomstvonyń baspasóz qyzmetinen habarlady.
Mundaı kúrdeli ota Qazaqstanda alǵash ret qolǵa alyndy. Ortalyq mamandary belarýstik áriptesterimen birlesip 12 saǵat boıy donordyń baýyrynyń jartysyn Pavlodar oblysynyń 6 jasar turǵyny Ilıa Panıhınge transplantatsııalaýdy júzege asyrdy.
Sońǵy jyldary bala baýyr jetispeýshiligimen aýyryp, baýyr tsırrozyna shaldyqqan. Donor - Ilıanyń 32 jasar naǵashy apasy. Bala bir aı boıy qarqyndy terapııa palatasynda jatty. Búgingi tańda onyń densaýlyǵy turaqtanyp, bólimge aýystyryldy. Donor operatsııadan keıin eki apta ótken soń ambýlatorııalyq emdeýge jiberildi.
Aıta keteıik, Qazaqstanda 100 jýyq bala músheler transplantatsııasyna muqtaj. Búgingi tańda aýystyryp salý músheleriniń, sondaı-aq, balalar transplantologııasy salasynda tájirıbesi bar mamandardyń jetispeýshiligi ózekti másele bolyp tabylady.
