Astanada alǵash ret asqazanǵa endoskopııalyq jolmen ota jasaldy
ASTANA. QazAqparat - №2 qalalyq aýrýhanada Cha Býndang aýrýhanasynyń (Ońtústik Koreıa Seýl qalasy) jetekshi dáriger gastroentorology professor Konyń jetekshiligimen asqazannyń qaterli isigi bar dep kúdik keltirilgen patsıentke joǵary mamandandyrylǵan ota jasaldy. Bul ádistemeniń ereksheligi - operatsııanyń endoskopııalyq jolmen jasalatyndyǵy.
Elorda ákimdiginiń saıtynyń habarlaýynsha, sheberlik synyby bıyl Astana qalasynyń densaýlyq saqtaý basqarmasy men Seýldiń Sýng Kvan Chaým medıtsınalyq qorynyń arasynda jasalǵan yntymaqtastyq jónindegi memorandým aıasynda júzege asqan.
- Búgin professor Ko óte sırek jasalatyn operatsııa túri boıynsha sheberlik synybyn ótkizdi- endoskopııalyq jolmen asqazandaǵy isiktiń shyryshasty rezektsııasy. Bári májilis zalda kórsetildi. Negizi, Cha medıtsınalyq korporatsııasy - Ońtústik Koreıadaǵy iri uıymdardyń biri. Hırýrg, endoskopshy jáne t.b. mamandardy daıarlaýda praktıkalyq kómek kórsetedi, - dedi №2 qalalyq aýrýhananyń bas dárigeri №2 Ivan Lı.
Onyń aıtýynsha, 1 qazannan bastap atalǵan korporatsııa jergilikti mamandardy eki aı boıy tegin oqytatyn bolady.
Biregeı endoskopııalyq jolmen ótkizilgen operatsııa ota jasaý aýmaǵyn azaıtyp, patsıentti az jaraqattaıdy, aýrýhanada jatý merzimin azaıtyp, tez jazylýyna septigin tıgizedi. Operatsııanyń bul túri elordada alǵash ret jasaldy.
Professor Konyń aıtýynsha, qazirgi kezde mundaı otalar ChA Býndang aýrýhanalarynan basqa, Ońtústik Koreıanyń 50 klınıkasynda jasalady.
- Biz asqazan men óńeshtiń qaterli isigin bastapqy kezeńde anyqtaımyz. Al Qazaqstanda qaterli isik tabylsa, kóp jaǵdaıda rezektsııa jasalady dep estidim. Organdy alyp tastaıdy, al biz tek zaqymdanǵan bóligin ǵana alamyz. Bizge Qazaqstannan operatsııa jasatýǵa adamdar kóp keledi. Sizderdiń dárigerlerińiz kelip oqysyn, ózimiz de kelip kórsetemiz,- deıdi dáriger.
Aıta keteıik, Ońtústik Koreıadaǵy Cha Býndang aýrýhanasynda bir jylda 1 mln-ǵa jýyq adam ambýlatorııalyq em-dom qabyldaǵan. Mekeme naýqastardy qabyldaý sany boıynsha Koreıadaǵy úzdik on aýrýhananyń biri.
