Astanada alǵash ret «Ámire» dramasy saxnalanady
ASTANA. QazAqparat - Qalıbek Qýanyshbaev atyndaǵy memlekettik akademııalyq qazaq mýzykalyq drama teatrynyń ártisteri Táýelsizdiktiń 25 jyldyǵyna oraı kórermenniń nazaryna kezekti jańa premerasyn usynbaqshy. Teatr ujymy jeltoqsannyń 6-sy kúni Astanadaǵy Beıbitshilik jáne kelisim saraıynda "Ámire" dramasyn alǵash ret saxnaǵa shyǵarady, dep xabarlaıdy.
«Ámireniń sýretkerlik sheberligi men ómirindegi qupııalary jaıyndaǵy dramatýrg Rahymjan Otarbaevtyń týyndysy, rejısser Nurlan Jumanııazovtyń qoltańbasymen úılesip sahna atty kıeli álemge jol tartpaq", - delingen teatrdyń resmı xabarlamasynda. Atalǵan premera dramatýrg R.Otarbaev pen rejısser N. Jumanııazovtyń Qallekı sahnasyndaǵy birlesken ekinshi jumystary bolmaq. Buǵan deıin olar «Nashaqorlar jaıly novella» pesasynyń jelisi boıynsha «Kóleńkesiz jolaýshy» atty dramany qoıǵan. Endi, osydan bir ǵasyr buryn Parıjde ótken EKSPO kórmesinde qazaqtyń atyn shyǵarǵan Ámire Qashaýbaevtyń ómiri men shyǵarmashylyǵyna arnap spektakl qoıǵaly otyr.
"1925 jyly Parıjde ótken Búkiládemdik "EKSPO" kórmesine qatysqan tuńǵysh qazaq taǵdyryna arnalǵan týyndynyń tabıǵatynda tobyr men tulǵanyń, ómir men ónerdiń, amanat pen qııanat uǵymdarynyń qaqtyǵysy beder alady. Keıis dúnıeden bereke tappaǵan Ámireniń - Án-Ámirege aınalyp óner kóginen ún qatqany baıandalady" , - deıdi uıymdastyrýshylar. Spektakldiń bas keıipkeri - Ámireniń beınesin teatr artısteri Qasymxan Buǵybaı men Asylbek Qapaev somdaıdy.
Pesa avtory - jazýshy, dramatýrg Rahymjan Otarbaev. Spektakldiń qoıýshy rejısseri - QR eńbek sińirgen qaıratkeri, rejısser - Nurlan Jumanııazov. Spektakldiń bas sýretshisi - Berik Býrbaev. Hormeısteri - QR eńbek sińirgen qaıratkeri Amantaı Jumashev.
