Astanada alǵash ret Altaı taekvondo chempıonaty ótedi
ASTANA. KAZINFORM – Maýsym aıynda Qazaqstan astanasynda «Altaic Taekwondo Championships» týrnıriniń alǵashqy maýsymy ótedi. Bul týraly Altaı taekvondo odaǵynyń otyrysynda málim etildi.
Kezdesýdiń basty sebebi – taekvondony damytý baǵyttaryn, halyqaralyq yntymaqtastyqty nyǵaıtý máselelerin jáne aldaǵy aılarǵa arnalǵan halyqaralyq jarystar kúntizbesin talqylaý boldy.
Jıynǵa Dúnıejúzilik taekvondo federatsııasynyń prezıdenti doktor Chýngvon Choý jáne Qazaqstan taekvondo federatsııasynyń jáne Altaic Taekwondo Union prezıdenti Kýdrát Shamıev jáne odaqqa múshe elder – Reseı, Túrkııa, Ońtústik Koreıa, Mońǵolııa, Ózbekstan jáne Qazaqstan ókilderi qatysqan. Óz kezeginde World Taekwondo prezıdenti doktor Choý Odaqty alda qyzyqty jaz maýsymy kútip turǵanyn atap ótti. Sondaı-aq Altaic Taekwondo Championships týrnıriniń alǵashqy maýsymyn joǵary deńgeıde ótkizý úshin odaq quramyndaǵy barlyq quramanyń tolyq qatysýy mańyzdy ekeni aıtyldy.
– Sport – tek jarys alańy emes, halyqtardy jaqyndastyratyn, senim men ózara túsinistikti nyǵaıtatyn mańyzdy qural da bola alady. Búgingi tańda taekvondo sııaqty sport túrleri mádenıetter arasyndaǵy dıalogty kúsheıtip, memleketter arasyndaǵy baılanystardy jańa deńgeıge kótere alady. Biz Altaic Taekwondo Union aıasynda bul baǵytty júıeli damytyp, sportty jumsaq kúshtiń tıimdi quralyna aınaldyrýdy kózdep otyrmyz, – dedi Qazaqstan taekvondo federatsııasynyń basshysy K. Shamıev.
2025 jyly qazan aıynda Qytaıdyń Ýsı qalasynda Altaic Taekwondo Union-nyń alǵashqy Bas assambleıasy ótken edi. Kelesi basqosý 2026 jylǵy 21 maýsymda Astanada ótedi.
Odan keıin 22–23 maýsym kúnderi jasóspirimder men eresekter arasynda Altaic Taekwondo Championships jarystary uıymdastyrylady. Bul týrnır Týrnır Dúnıejúzilik taekvondo federatsııasynyń resmı kúntizbesine engizilgen jáne G-1 sanatynda ótedi, bul onyń joǵary halyqaralyq mártebesin aıqyndaıdy.
Aıta keteıik, jalpy 2026 jyly Astanada taekvondodan úsh halyqaralyq týrnır ótedi. 22-23 maýsym aralyǵynda Altaic Cup týrnıri ótetini belgili. Odan eki kún ótken soń, 25 maýsymda Kazakhstan Open-2026 jarysy bastalady. Týrnır 27 maýsymǵa deıin jalǵasady.
Al halyqaralyq jarys kúntizbesindegi eń mańyzdy dodalardyń biri - Gran-prı fınaly. Bul jarys 28-29 qarasha aralyǵynda ótedi.
Eske sala ketsek, Qazaqstan quramasy taekvondodan Tashkentte ótip jatqan jasóspirimder arasyndaǵy álem chempıonatynda alǵashqy júldege ıe boldy. 48 kelige deıingi salmaqta Erasyl Erzat qola medal jeńip aldy. Jasóspirimder arasyndaǵy álem chempıonaty 17 sáýirge deıin jalǵasady.