Astanada alǵash ıslamdyq qarjylandyrý jáne bıznes forýmy ótip jatyr
ASTANA. KAZINFORM – Búginde elorda tórine ıslamdyq qarjylandyrý salasynyń mamandary men bıznes ókilderi jınaldy.
- Forým aıasynda ıslamdyq qarjylandyrýdyń odan ári damýy, ıslamdyq fınteh, ıslam ekonomıkasyndaǵy marketıng jáne áıelder kóshbasshylyǵy sııaqty máseleler talqylanady. Jalpy, forýmnyń ereksheligi – Ortalyq Azııa men TMD elderindegi ıslamdyq qarjy jáne bıznes salasyndaǵy yqpaldy áıelderdi marapattaý saltanaty. Qazir Qazaqstanda úsh ıslam banki jumys isteıdi. Olardyń ekeýi – qazaqstandyq ıslam banki, olar: ADCB Islamic jáne Zaman Islamic Bank, sondaı-aq Astana halyqaralyq qarjy ortalyǵynyń Al-Safı banki, - dedi Islamdyq qarjy jáne bıznes qaýymdastyǵynyń tóraǵasy, Astana halyqaralyq qarjy ortalyǵynyń ıslam qarjy baǵyty boıynsha jetekshisi Mádına Týkýlova.
Sondaı-aq búgingi is-shara barysynda ıslamdyq qarjy ındýstrııasynyń damýyna yqpal etetin birqatar memorandýmǵa qol qoıý josparlanyp otyr.
- Atap aıtqanda, Astana halyqaralyq qarjy ortalyǵy men Qazaqstan-Nıgerııa iskerlik keńesin tanystyratyn kompanııa arasynda memorandýmǵa qol qoıylady. Bul memorandým nıgerııalyq ıslamdyq qarjy kompanııalaryn Qazaqstan naryǵyna tartýǵa baǵyttalǵan. Sonymen qatar Islamdyq qarjy jáne bıznes qaýymdastyǵy men Islamdyq qurylysshylar qaýymdastyǵy arasynda turǵyn úı qurylysy salasyndaǵy ıslamdyq qarjylandyrý máselelerin damytý maqsatynda memorandýmǵa qol qoıylady. Sondaı-aq ıslamdyq qarjylandyrý salasyndaǵy komplaens máselelerin jáne ıslamdyq qarjynyń damýyn ilgeriletý maqsatynda Compliance Hub uıymymen memorandýmǵa qol qoıylady. Odan bólek, Astana halyqaralyq qarjy ortalyǵy qatysýshylary, ITS halyqaralyq platformasy jáne zeket qory arasynda aýqymdy memorandýmǵa qol qoıylady, - deıdi ol.
Forýmnyń alǵashqy sessııasy Ortalyq Azııa jáne álemde ıslamdyq qarjynyń damý perspektıvalaryna arnaldy. Spıkerler ıslamdyq bankıngti engizý tájirıbesimen bólisip, halyqaralyq yntymaqtastyq máselelerin talqylap jatyr.
- Jalpy Qazaqstanda ıslamdyq qarjylandyrý joǵary deńgeıde damyp keledi. Bizde birneshe ıslamdyq qarjy ınstıtýty jumys isteıdi, zańnamalyq baza qalyptasqan jáne qazir jańa ıslamdyq qarjy quraldaryn damytýda úlken serpin baıqalyp otyr. Ótken jyly Qazaqstanda alǵash ret korporatıvtik qatysýshylar úshin ıslamdyq baǵaly qaǵazdary shyǵaryldy. Qazaqstanda jáne Astana halyqaralyq qarjy ortalyǵy aýmaǵynda alǵashqy ıslamdyq ınvestıtsııalyq qor quryldy. Ortalyq Azııa elderimen salystyrǵanda, bizde tájirıbe bar jáne bólise alamyz. Mysaly, Qyrǵyzstanda ıslamdyq qarjylandyrý boıynsha zańnama bar, al Ózbekstanda ıslamdyq bankıngti damytýǵa qatysty zańnama qabyldaý josparlanyp otyr, - deıdi M.Týkýlova.
Aıta keteıik, forýmdy Islamdyq qarjy jáne bıznes qaýymdastyǵy TIDAM agenttigimen birlesip, Astana halyqaralyq qarjy ortalyǵynyń qoldaýymen uıymdastyryp otyr. Oǵan 200-den astam adam qatysty.
2019 jyly IFSB bas hatshysy Qazaqstanda ıslamdyq qarjylandyrý múmkindigine baǵa bergen edi.