Astanada áleýmettik mańyzy bar azyq-túlikti qaı jerden arzan alýǵa bolady
ASTANA. KAZINFORM – Elordadaǵy 190-nan astam saýda núktesinde baǵany turaqtandyrý tetigi aıasynda jetkiziletin azyq-túlik taýarlary naryqtaǵydan tómen baǵamen satylyp jatyr. Bul týraly Astana qalasynyń Investıtsııalar jáne kásipkerlikti damytý basqarmasy basshysynyń orynbasary Maqsat Jańabaev málimdedi.
Basqarma málimetinshe, atalǵan ónimder Magnum, Small, «Fermag», «Vkýsmart», «Anvar» saýda jelilerinde, «Shapaǵat» pen «Kóktal» bazarlarynda satylady.
– Búginde 18 myń tonnadan astam azyq-túlik jetkizýge kelisimshart jasalǵan. Ónimder elordadaǵy 190-nan astam iri saýda núktesinde naryqtaǵydan tómen, belgilengen baǵamen satylyp jatyr, – dedi Maqsat Jańabaev Astana qalasynyń Kommýnıkatsııalar qyzmetinde ótken baspasóz konferentsııasynda.
Onyń aıtýynsha, azyq-túlik baǵasyn turaqtandyrý úshin aýyl sharýashylyǵy taýaryn óndirýshilerge qaryz berilip, ónim jetkizý jóninde aldyn ala kelisimshart jasalady.
Osy tetik aıasynda Túrkistan, Aqmola, Qyzylorda, Jambyl, Qostanaı jáne Aqtóbe oblystaryndaǵy kókónis, et, sút jáne bakaleıa ónimderin óndirýshilermen kelisim jasalǵan.
11 qarashadaǵy jaǵdaı boıynsha Astanada áleýmettik mańyzy bar azyq-túlik taýarlary baǵasynyń ındeksi 101,2 paıyzdy, respýblıka boıynsha 102 paıyzdy quraǵan.
Byltyr bul kórsetkish elordada 107,4 paıyz, respýblıka boıynsha 108,6 paıyz bolǵan. Al 2024 jyly tıisinshe 98,9 jáne 101,4 paıyzdy quraǵan.
Basqarma ókiliniń sózinshe, azyq-túlik baǵasyn tejeý úshin otandyq óndirýshilerdi qoldaýǵa, ónimdi tikeleı jetkizýge jáne deldaldar sanyn azaıtýǵa basymdyq berilip otyr.
Eske salaıyq, Premer-mınıstr Oljas Bektenov azyq-túlik baǵasyn turaqtandyrý úshin ónimdi tikeleı jetkizý kólemin ulǵaıtýdy tapsyrǵan edi.