Astanada áleýmettik mańyzy bar azyq-túlik taýarlarynyń tizimi ýaqytsha keńeıtildi
ASTANA. KAZINFORM — Áleýmettik mańyzy bar taýarlar (ÁMAT) tizbesin ýaqytsha keńeıtýdiń basty maqsaty — halyq úshin eń kóp suranysqa ıe ónimderdiń qoljetimdiligin arttyrý jáne baǵa turaqtylyǵyn qamtamasyz etý. Bul týraly Astana boıynsha saýda jáne tutynýshylardyń quqyqtaryn qorǵaý departamentiniń basshysy Ǵalymjan Ilıasov málimdedi.
Onyń aıtýynsha, atalǵan sheshim azamattardyń kúndelikti tutyný sebetine kiretin birqatar azyq-túlik ónimi baǵasynyń sońǵy ýaqytta joǵary qubylmalylyq tanytýyna baılanysty qabyldanǵan.
— Tizimge eń qarapaıym, biraq halyq kún saıyn tutynatyn ónimder engizildi. Dál osy taýarlardyń qymbattaýy azamattardyń narazylyǵyn týdyryp otyr, óıtkeni baǵa ósse de, adamdar olardy satyp alýǵa májbúr. Sondyqtan bul ónimder barshaǵa qoljetimdi bolýy tıis, — dedi departament basshysy Astana qalasynyń Kommýnıkatsııalar qyzmeti alańynda.
Onyń sózinshe, ÁMAT qataryna engizilgen taýarlardy óndirýshiler men ımporttaýshylar saýda jelilerine syıaqy men retro-bonýs tóleý mindetinen bosatylady. Bul óz kezeginde bosatylǵan qarjyny bıznesti damytýǵa baǵyttaýǵa múmkindik beredi.
— Sondaı-aq saýda sýbektileri úshin saýda ústemesiniń 15 paıyzdan aspaıtyn shekti mólsherin saqtaý talaby engiziledi. Bul halyq úshin ónimniń túpkilikti baǵasyn tómendetýge jáne azyq-túlik ınflıatsııasyn turaqtandyrýdy qamtamasyz etýge múmkindik beredi, — dedi ol.
Ǵalymjan Ilıasov ÁMAT tizimine engen taýar óndirýshiler memlekettik qoldaý sharalaryna qol jetkize alatynyn da atap ótti. Atap aıtqanda, jeńildetilgen tasymal, turaqtandyrylǵan kommýnaldyq tarıfter, aınalym qarajatyn jeńildikpen qarjylandyrý jáne ózge de qoldaý tetikteri qarastyrylǵan.
Spıkerdiń aıtýynsha, tizimniń keńeıýi eń aldymen aralyq deldaldarǵa áser etedi, óıtkeni baǵa shekteýleri olardyń marjasynyń tómendeýine ákelýi múmkin. Bul kóterme jáne bólshek saýda ókilderiniń belgili bir narazylyǵyn týdyrýy yqtımal.
— Baǵanyń ósýin shekteý jáne baǵa belgileýdiń ashyq erejelerin engizý áleýmettik mańyzy bar taýarlardyń qoljetimdiligin arttyrady. Bul ásirese áleýmettik osal toptar úshin mańyzdy. Nátıjesinde naryq neǵurlym turaqty ári tutynýshylar úshin boljamdy bola túsedi, — dep túıindedi ol.
Eske sala keteıik, bul másele Úkimette Premer-mınıstrdiń orynbasary — ulttyq ekonomıka mınıstri Serik Jumanǵarınniń tóraǵalyǵymen jańa jyldaǵy ınflıatsııany turaqtandyrý máseleleri jónindegi alǵashqy keńes barysynda talqylandy.