Astanada áleýmettik kómek pen tólemder júıesi qalaı ózgeredi
ASTANA. KAZINFORM – Astanada áleýmettik kómek kórsetý júıesin biryńǵaı standartqa kóshirý máselesi qaraldy. Bul týraly Astana qalasy máslıhatynyń segizinshi shaqyrylymynyń kezekti sessııasynda qalalyq Jumyspen qamtý jáne áleýmettik qorǵaý basqarmasynyń basshysy Erlan Júsipov baıandady.
Onyń aıtýynsha, bastama áleýmettik tólemderdiń túrlerin, merzimderin jáne mólsherin birizdendirýge baǵyttalǵan. Bul memlekettik qoldaý sharalarynyń ashyqtyǵy men ataýlylyǵyn arttyrýǵa múmkindik beredi.
– Áleýmettik kómektiń jekelegen túrlerin biriktirý jáne olardy respýblıka aýmaǵynda usynýdyń biryńǵaı tásilderin qalyptastyrý áleýmettik qoldaý júıesiniń ashyqtyǵyn arttyrýǵa, memlekettik qoldaý sharalarynyń ádil ári ataýly bólinýin qamtamasyz etýge, sondaı-aq azamattardyń turǵylyqty jerine qaramastan memlekettik kómekke teń qol jetkizýine múmkindik beredi, – dedi Erlan Júsipov.
Ol atalǵan jumys Qazaqstan Respýblıkasy Premer-mınıstriniń tapsyrmasy aıasynda júrgizilip jatqanyn jáne áleýmettik kómek kórsetý tetikterin jetildirýge baǵyttalǵanyn atap ótti.
Bastama aıasynda qoldanystaǵy áleýmettik qoldaý sharalaryn biryńǵaı formatqa keltirý, qaıtalanatyn tólemderdi alyp tastaý jáne bıýdjet qarajatyn bólýdiń tıimdiligin arttyrý kózdelgen.
Sonymen qatar usynylyp otyrǵan ózgerister qala bıýdjetine túsetin júktemeni azaıtýǵa jáne ásirese elordaǵa kóshi-qon aǵynynyń artýy jaǵdaıynda áleýmettik shyǵystardy josparlaý tıimdiligin jaqsartýǵa múmkindik beretini aıtyldy.
Máslıhat depýtattary atalǵan usynysty qoldap, tıisti sheshim qabyldady.
Aıta keteıik, áleýmettik kepildikter endi kásibı táýekel deńgeıine baılanysty beriledi.
