Astanada Áleýmettik salaǵa monıtorıng júrgizetin jumys tobynyń otyrysy ótti

ASTANA. QazAqparat - Astana qalasynda Qazaqstan Respýblıkasyndaǵy Adam quqyqtary jónindegi ýákil (Ombýdsmen) Asqar Shákirovtyń tóraǵalyǵymen Áleýmettik jáne eńbek salalarynda monıtorıng júrgizý boıynsha Jumys tobynyń otyrysy ótti. Bul týraly QazAqparat Ýákil apparatynyń baspasóz-qyzmetine silteme jasap habarlaıdy.

Áleýmettik jáne eńbek quqyqtaryn qamtamasyz etý, sondaı-aq osy saladaǵy qaıshylyqtardy boldyrmaý maqsatynda qurylǵan Jumys toby quramyna Bas prokýratýranyń, Eńbek jáne halyqty áleýmettik qorǵaý mınıstrliginiń, Kásipodaqtar federatsııasynyń, «Samuryq-Qazyna» AQ-nyń, «Atameken» ulttyq kásipkerler palatasynyń, azamattyq qoǵam jáne ǵylymı toptardyń ókilderi kiredi.

Otyrys sheńberinde basym baǵyttary Elbasynyń baǵdarlamalyq qujattarynda qoıylǵan mindetterdi júzege asyrý kontekstinde toptyń qyzmetiniń basym baǵyttary talqylandy.

Qatysýshylarmen tııanaqty pikir almasýlar barysynda eńbek qatynastarynda medıatsııany damytý, eńbek zańnamasynyń aqparattyq-túsindirý jumystaryn kúsheıtý, kásipodaqtardyń rólin kúsheıtý jáne osy saladaǵy vedomstvoaralyq yntymaqtastyqtyń tıimdiligin arttyrý qajettiligine nazar aýdaryldy.

Otyrystyń nátıjelerin qorytyndylaı kele, Ombýdsmen, eńbek qatynastarynda taraptarynyń múddeleriniń turaqty teńgerimin, eń aldymen, qoldanystaǵy zańnamaǵa jáne jalpyǵa tanylǵan halyqaralyq standarttarǵa sáıkes azamattardyń eńbek quqyqtaryn saqtaýdyń mańyzdylyǵyn atap ótti.