Astanada áleýmettik salada eńbek etip júrgen bir top qyzmetkerler baspanaly boldy
sp;ASTANA. Jeltoqsannyń 28-i. QazAqparat /Jasulan Amanbaıuly/ - Astana qalasynyń ákimi Imanǵalı Tasmaǵambetov áleýmettik salada eńbek etip júrgen bir top qyzmetkerlerge jańa 36 páterdiń kiltterin tabys etti,
dep habarlaıdy QazAqparat.
Áskerı qyzmetshiler, ártister, jýrnalıster, memlekettik qyzmetshiler, múgedekter, densaýlyq saqtaý jáne bilim berý salasynyń mamandary Qazaqstan Prezıdentiniń qurylys salasy men úleskerler máselesin sheshý jónindegi tapsyrmasy aıasynda jaldyq baspanaǵa ıe boldy.
Daǵdarysqa qarsy baǵdarlama sheńberinde Astanada qurylysy aıaqtalmaǵan qurylys nysandarynan 6203 páter satyp alynyp, olar Qazaqstan Prezıdentiniń qurylys salasy men úleskerler máselesin sheshý jónindegi tapsyrmasyn oryndaý úshin arendaǵa beriledi dep sheshilgen bolatyn. Mine, sonyń esebinen «Batyr» jáne «Everest» turǵyn úılerinen satyp alynǵan páterler búgin 36 adamǵa berilip otyr.
«10 jyl buryn osynda kóshkende elorda az ýaqytta ǵajaıyp qala bolady dep kim oılaǵan. Endi osy qalada ózderińiz turyp, eńbek etip jatyrsyzdar. Eseli eńbekterińiz, mańdaı terin tógip jatqan qyzmetterińiz Elbasynyń jadynda. Ony baǵalap otyrady, onyń ishinde jas kadrlardy baǵalaıdy», dedi I.Tasmaǵambetov quttyqtaý sózinde.
