Astanada áleýmettanýshylar kongresi ótip jatyr

ASTANA. QazAqparat - Astanada Úshinshi jańǵyrý máselelerine arnalǵan VI áleýmettanýshylar kongresi ótip jatyr, dep habarlaıdy QazAqparat tilshisi.

Kongrestiń birinshi kúni jas áleýmettanýshylar forýmy, jergilikti atqarýshy organdar men jergilikti BAQ ókilderine arnalǵan semınarlar uıymdastyrylýda.

Ekinshi kúni Ulttyq akademııalyq kitaphanada Astananyń 20 jyldyǵyna arnalǵan «Astana jetistikter mekeni - Eýrazııa tórindegi jańa qala, jańa ıdeıalar, jańa shynaıylyq» atty plenarlyq otyrysy ótedi.

Kongress jumysyna sheteldik áleýmettanýshy mamandar da qatysýda, atap aıtqanda Halyqaralyq áleýmettanýshylar qaýymdastyǵynyń vıtse-prezıdenti, áleýmettaný ǵylymdarynyń doktory Eloıza Martın, odan bólek Japonııa, Túrkııa, Reseı, BAÁ, Germanııa elderiniń ókilderi qatysýda.

Aıtýly sharada qaralyp jatyrǵan ózekti máseleler ol - azamattyq qoǵamdy qurý, «Rýhanı jańǵyrý» baǵdarlamasyn iske asyrý jáne BUU-nyń damý baǵdarlamasy aıasyndaǵy áleýmettik zertteýlerdi tanystyrý.

Kongress barysynda elimizde áleýmettaný ǵylymynyń damýyna úles qosqan áleýmettanýshy ǵalymdar marapattaldy.

Uıymdastyrýshylardyń aıtýynsha, kongress jumysynyń nátıjesi boıynsha materıaldardyń jınaǵy «Áleýmettaný - Sociology» jýrnalynyń arnaıy basylymy ázirlenedi.

Aıta keteıik, atalǵan sharanyń uıymdastyrýshylary - QR Qoǵamdyq damý mınıstrligi men Qazaqstannyń áleýmettanýshylar qaýymdastyǵy qoǵamdyq uıymy.