Astanada álemge tanymal «Steinway» mýzykalyq brendiniń ókildigi ashyldy
ASTANA. QazAqparat - Qazaqstannyń Halyq ártisi Aıman Musaqojaeva men Vengrııanyń tuńǵysh ǵaryshkeri Bertalen Farkash elimizde ashylyp otyrǵan eń alǵashqy «Steinway and Sons» mýzykalyq aspaptar shyǵaratyn áıgili brend ókildiginiń ashylýyna qatysty.
"Bul ortalyqtyń "Astana Opera" teatrynyń qarama-qarsy tusynda ornalasýynyń ózinde úlken mán bar. Bul shynymen eleýli tarıhı oqıǵa. Sebebi osynaý deńgeıdegi álemdik brend bizdiń Qazaqstanǵa kelip otyr. Astanada barlyǵy bar, ashylýy tıis nárseniń barlyǵy ashylǵan sekildi, degenmen biz búgin "Steinway" brendiniń ashylýyna kýá bolyp otyrmyz", - deıdi A. Musaqojaeva.
Onyń sózine qaraǵanda, buryn qazaqstandyq mýzykanttar ózine laıyqty aspap tańdaý úshin Germanııaǵa nemese AQSh-qa sabyltyp, alys jol júrýge májbúr edi, endi ony elordada da satyp alýǵa bolady.
Vengrııanyń tuńǵysh ǵaryshkeri Bertalen Farkash, Steinway ókildiginiń ashylýyna qatysyp, Astananyń kóz toımas kórkine jáne tarıhı oqıǵanyń bir bólshegi bolǵanyna erekshe qýanysh bildirdi. "Astana - óte kórikti qala. Qazaq halqy asa qonaqjaısyzdar. Barlyǵy tamsandyrýda. Osy oqıǵaǵa arnaıy at basyn tiredim, osy jerde tap bolǵanyma dán rızamyn", - deıdi ol. "Rahmanınov, Petrov jáne kóptegen uly mýzykanttar "Steinway" aspaptarynda oınaǵan jan, ózge quraldarǵa jolaǵysy kelmeı qalady" dep bul brendti erekshe áspettegen. Mine, búgin sol ataqty "Steinway" bizdiń elimizde de ókildigin ashyp otyr. Árıne bunyń barlyǵy bizdiń Memleket basshysymyzdyń muqalmas bedeliniń, barsha Qazaqstannyń abyroıynyń arqasynda múmkin boldy. Álemniń kóptegen elderi osy brendtiń ashylýyn ańsap kútip júr. Sebebi bul biregeı aspaptar, naǵyz óner týyndysy", - deıdi ókildiktiń basshysy Tildash Bıtýova.
Kompanııanyń Ortalyq jáne Shyǵys Eýropadaǵy aımaqtyq menedjeri Anton Vılgelm, "Steinway" kompanııasynyń tujyrymdamasy - ol eń bastysy ónerge ortaqtas bolý ekendigine erekshe toqtaldy. "Bul, sóz joq, kommertsııalyq joba. Degenmen biz úshin ol basty maqsat emes, biz úshin eń bastysy - halyqtardy ónerge tartý, minsiz aspaptarda oınaý. Kez kelgen adam, kásibı mýzykant nemese qarapaıym turǵyn bizge kelip, aspaptardyń birinde oınaı alady. Mundaı múmkindikter bizdiń barlyq ókildikterimizde jasalǵan", - dep atap ótti ol. Is-sharaǵa Astana ákimdiginiń ókilderi, kásibı mýzykanttar men shetel dıplomattary qatysty. «Steinway& Sons» - áıgili Stradıvarı syndy brendtermen deńgeıles turǵan aspaptar shyǵaratyn eń iri ári kóp jylǵy tarıhy bar korporatsııa.
