Astanada álemge tanymal «Charleıdiń ápkesi» komedııasy qazaq tilinde qoıylady
ASTANA. QazAqparat - 18-19 naýryz kúnderi Astana qalasynyń komedııa teatrynda álemge tanymal «Charleıdiń ápkesi» mýzykalyq komedııasynyń qazaq tilindegi premerasy ótedi. Bul týraly teatrdyń baspasóz qyzmetine silteme jasap QazAqparat habarlaıdy.
Pesany aǵylshyn dramatýrgy Brendon Tomas jazǵan, kompozıtory - Oskar Feltsman. I.Orazbaev, T.Nurmaǵanbetov, T.Toqbergenov qazaq tiline aýdarǵan. Qoıýshy rejısseri - Qazaqstannyń eńbek sińirgen qaıratkeri Saılaý Qamıev.
«Charleıdiń ápkesi» - áli kúnge deıin ózektiligin joǵaltpaǵan álemge tanymal komedııa.
«Shym-shytyryq oqıǵalarǵa toly mýzykalyq komedııanyń basty keıipkerleri - Djek jáne Charleı esimdi stýdentter. Jigitter jas, albyrt, sondyqtan da olarǵa baılyqtan góri shynaıy sezim qymbattyraq. Súıgenderine qol jetkizý úshin olar eshteńeden taıynbaıdy.
Alaıda, ótiriktiń kómegimen jetken baqyt qanshalyqty baǵaly bolmaq?! Rııasyz kóńil men qyzǵanysh, shyndyq pen jalǵan, adaldyq pen aramdyq arpalysqa túsken spektaklde shynaıy mahabbat áspettelip, ádilettilik saltanat qurady», - delingen baspasóz habarlamasynda.
