Astanada álemdik at sporty dodasy bastaldy: jeńimpazdar 22 qarashada anyqtalady

ASTANA. KAZINFORM — Astanada konkýrdan FEI Álem kýbogy Eýrazııa lıgasynyń fınaly saltanatty túrde ashyldy. 22 qarashaǵa deıin jalǵasatyn jarysta Qazaqstan, Grýzııa, Qyrǵyzstan, Reseı jáne Ózbekstannyń úzdik shabandozdary Grand-fınalǵa joldama alý úshin synǵa túsedi.

Astanada álemdik at sporty dodasy bastaldy: jeńimpazdar 22 qarashada anyqtalady
Foto: Aǵybaı Aıapbergenov\Kazinform

Shara barysynda jarysqa qatysýshy 5 memlekettiń — Grýzııa, Qazaqstan, Qyrǵyzstan, Reseı jáne Ózbekstannyń ulttyq quramalary saltanatty sherýmen alańǵa shyqty. Sportshylar sherýin sport sheberi Oleg Sokolenko bastap júrdi.

Astanada álemdik at sporty dodasy bastaldy: jeńimpazdar 22 qarashada anyqtalady
Foto: Aǵybaı Aıapbergenov\Kazinform

Ashylý saltanatynda Qazaqstan Respýblıkasynyń Memlekettik Týyn Ulttyq ulannyń Qurmet qaraýyly saltanatpen alyp shyǵyp, Memlekettik Ánurandy balalar hory oryndady.

Shara barysynda QR Týrızm jáne sport mınıstrligi Sport jáne dene shynyqtyrý isteri komıteti tóraǵasynyń orynbasary Amanbaı Nurmuhanbetov osy jarysty uıymdastyrýǵa sebepshi bolyp otyrǵan QR At sporty federatsııasyna QR Týrızm jáne sport mınıstrligi atynan alǵys bildirdi.

Astanada álemdik at sporty dodasy bastaldy: jeńimpazdar 22 qarashada anyqtalady
Foto: Kazinform

Reseı At sporty federatsııasynyń atqarýshy dırektory Vadım Skoropýpov Halyqaralyq at sporty federatsııasy (FEI) Bıýrosynyń múshesi, Eýrazııalyq at sporty qaýymdastyǵynyń jáne Reseı at sporty federatsııasynyń prezıdenti Marına Sechınanyń quttyqtaý sózin oqyp berdi.

— Eýrazııalyq lıganyń damı túsip, elderimiz arasyndaǵy sporttyq jáne dostyq baılanystardy nyǵaıtyp jatqany erekshe qýantady. Mundaı jarystar sportshylarǵa jańa múmkindikter ashyp qana qoımaı, sonymen qatar tájirıbe almasýǵa, sheberlik deńgeıin arttyrýǵa jáne at sportyn keńinen nasıhattaýǵa yqpal etedi. QR At sporty federatsııasyna jáne týrnır uıymdastyrýshylaryna kórsetken qonaqjaılylyǵy, is-sharany joǵary deńgeıde daıyndaǵany, sondaı-aq halyqaralyq sporttyq yntymaqtastyqty damytýǵa qosqan úlesi úshin shynaıy alǵysymdy bildiremin, — delingen quttyqtaý hatta.

Astanada álemdik at sporty dodasy bastaldy: jeńimpazdar 22 qarashada anyqtalady
Foto: Kazinform

Halyqaralyq at sporty federatsııasynyń (FEI) vıtse-prezıdenti Mark Samýel Qazaqstanǵa kelgenine nebári bir kún bolsa da, bul elde jylqyǵa degen súıispenshiliktiń bar ekenin birden baıqaǵanyn aıtty.

— Bizdiń prezıdent jeksenbi kúni osynda bolady. Bul aımaqtyń FEI úshin qanshalyqty mańyzdy ekenin kórsetedi, sondyqtan Eýrazııalyq lıganyń fınalyna oraı osynda kelgenime óte qýanyshtymyn, — dedi Mark Samýel.

QR Ulttyq olımpıadalyq komıtetiniń bas dırektory Nurlan Nógerbek keıingi jyldary Federatsııanyń jaqsy jumys atqaryp, oń serpin kórsetip kele jatqanyn atap ótti.

Astanada álemdik at sporty dodasy bastaldy: jeńimpazdar 22 qarashada anyqtalady
Foto: Kazinform

— Qazirgi ýaqytta biz Halyqaralyq olımpıada komıtetimen jáne Federatsııamen birlesip, jattyqtyrýshylarǵa arnalǵan kýrstardy uıymdastyrý baǵytynda jumys istep jatyrmyz.Іlgerileýshilikti kórip otyrmyz jáne Federatsııanyń jumysyn qoldaımyz.Sportshylarymyzdy alda talaı jetistikter kútip turǵanyna senimdimin, — dedi N. Nógerbek.

Týrnırdi QR At sporty federatsııasynyń prezıdenti Rýstam Baıalıev resmı túrde ashyp, qatysýshylarǵa sáttilik tiledi.

— Búgin elordamyzda álemdik deńgeıdegi aıtýly doda — konkýrdan FEI Álem Kýbogy Eýrazııalyq lıgasynyń fınalyn ashyp otyrmyz. Bul — Eýrazııa keńistigindegi eń bedeldi básekelerdiń biri. Bıyl elimiz Álem kýbogynyń úsh kezeńin joǵary deńgeıde ótkizip, mine, búgin sol maýsymnyń sheshýshi máresin qabyldap otyr. Osyndaı aýqymdy halyqaralyq jarystardyń joǵary deńgeıde ótýine zor qoldaý kórsetken Qazaqstan Respýblıkasy Týrızm jáne sport mınıstrligine, Ulttyq Olımpıada komıteti men Astana qalasynyń ákimdigine, sondaı-aq bas demeýshimiz «Kaztsınk» kompanııasyna erekshe alǵysymdy bildiremin, — dedi R. Baıalıev.

Astanada álemdik at sporty dodasy bastaldy: jeńimpazdar 22 qarashada anyqtalady
Foto: Kazinform

Onyń aıtýynsha, osy qarasha aıy Federatsııa úshin óte jemisti bolǵan.

Úsh mańyzdy respýblıkalyq jarysty sátti ótken:

  • Konkýrdan jasóspirimder men ıýnıorlar arasyndaǵy el birinshiligi;
  • Eresekter arasyndaǵy konkýrdan Qazaqstan chempıonaty;
  • Paralımpıadalyq mánerlep júrýden Qazaqstan chempıonaty.

— Bul jarystardyń qorytyndysy bizge zor úmit syılady. Elimizde at sportyna qyzyǵatyn, álemdik deńgeıde básekege túse alatyn jańa, talantty jas býyn ósip kele jatqanyn anyq kórdik. Jalpy, Qazaqstan at sporty sońǵy kezde álemdik arenada ózin senimdi túrde tanytyp, halyqaralyq jarystarda boı kórsete bastady. Bizdiń baǵytymyz aıqyn, alǵa qoıǵan maqsatymyz zor! Sonyń bir dáleli — aldaǵy jyly Álem kýbogy kezeńi aıasynda Olımpıada oıyndaryna lıtsenzııa beretin arnaıy kvalıfıkatsııalyq týrnır (Special Event) ótkizýge resmı ótinim berdik. Bul jetistikter — birlesken jumystyń jemisi. Qazirgi tańda Halyqaralyq at sporty federatsııasymen, Eýrazııalyq at sporty assotsıatsııasymen jáne aımaqtyq federatsııalarmen áriptestik baılanysymyz burynǵydan da bekı tústi. Búgingi jarysqa Eýrazııa aımaǵyndaǵy eń myqty degen shabandozdar jınaldy. Jalpy reıtıngte úzdik shyqqan sportshylarmen qatar, arnaıy kvotamen shaqyrylǵan qatysýshylar baq synaıdy. Sulýlyq pen tektiliktiń, tózimdilik pen sheberliktiń jarqyn úlgisin kórsetedi. Barsha qatysýshyǵa sáttilik, minsiz sekirý, al kórermenge umytylmas áser tileımin, — dedi QR At sporty federatsııasynyń prezıdenti Rýstam Baıalıev.

FEI jáne Eýrazııalyq at sporty qaýymdastyǵynyń qoldaýymen ótip jatqan týrnır 2027 jyly Máskeýde bolatyn Eýrazııa oıyndaryna daıyndyq kezeńinde strategııalyq mańyzǵa ıe. Jarysta 5 eldiń úzdik shabandozdary FEI Álem Kýbogynyń Grand-fınalyna joldama alý úshin baq synap jatyr.

Astanada álemdik at sporty dodasy bastaldy: jeńimpazdar 22 qarashada anyqtalady
Foto: Kazinform

Saltanatty rásimnen keıin jarystyń negizgi sporttyq baǵdarlamasy — 150 sm bıiktiktegi kedergilerden ótý boıynsha CENTER CREDIT BANK CUP básekesi bastaldy.

Aıta keteıik, jarystardyń Bas demeýshi — KAZZINC. Resmı demeýshiler — Bank CenterCredit, ULTIMA (Yandex Go Ultima), Wyndham Garden Astana, EMPIRE, The St. Regis Astana. Bas aqparattyq seriktes — QAZSPORT HD telearnasy.
Jarys 22 qarasha kúni aıaqtalady. Kirý tegin.