Astanada Álemdik jáne dástúrli dinder kóshbasshylarynyń VI Sezine ázirlik talqylandy

ASTANA. QazAqparat - Búgin Parlament Senatynyń Tóraǵasy, Álemdik jáne dástúrli dinder lıderleri Sezi Hatshylyǵynyń basshysy Qasym-Jomart Toqaevtyń tóraǵalyq etýimen Álemdik jáne dástúrli dinder lıderleriniń VI Sezine ázirlik jónindegi memlekettik komıssııanyń alǵashqy otyrysy boldy.

Bul týraly Joǵarǵy Palatanyń baspasóz qyzmeti habarlaıdy.

VI Sezd 2018 jylǵy 10-11 qazanda Astanada ótedi. Q. Toqaev kirispe sózinde aldaǵy Sezdiń ótetin ýaqyty onyń 15 jyldyǵymen tuspa-tus keletinin atap ótti.

«Bul merzimde forým álem qoǵamdastyǵy tarapynan keńinen moıyndaldy, Qazaqstannyń syrtqy saıasatynyń tanymal brendine aınaldy. Sezdiń dinder men mádenıetter arasyndaǵy jahandyq únqatysýdy ilgeriletýge qosqan úlesi BUU Bas Assambleıasynyń qararlarynda atap ótildi», - dedi Senat Tóraǵasy.

Q. Toqaev forýmǵa ázirlik jónindegi sharalar josparyna sáıkes, tıisti mekemelerge tapsyrma berdi. Sezd Hatshylyǵynyń basshysy dinaralyq únqatysýǵa qosqan úlesi úshin Astana halyqaralyq syılyǵyn berýge jáne Sezdiń Qurmetti medalimen marapattaýǵa, sondaı-aq Beıbitshilik jáne kelisim murajaıynyń ashylýyna baılanysty máselelerdi muqııat pysyqtaýǵa shaqyrdy.

Senat Apparatynyń basshysy, Memlekettik komıssııanyń hatshysy Serik Sydyqov basqaratyn Sezdiń Uıymdastyrý komıteti ázirlik jumystaryn úılestiretin bolady.

Syrtqy ister mınıstri Qaırat Abdrahmanov, din isteri jáne azamattyq qoǵam mınıstri Nurlan Ermekbaev, mádenıet jáne sport mınıstri Arystanbek Muhamedıuly, Astana ákiminiń orynbasary Ermek Amanshaev VI Sezge ázirlik jónindegi atqarylǵan jumystar týraly sóz sóıledi.