Astanada álemdik telearnalardyń sarapshylary tájirıbelerimen bólisýde
ASTANA. QazAqparat - Elordada «Qazaqstandyq telearnalardyń kontentindegi tsıfrlyq tehnologııalardy qoldaný» taqyrybynda aımaqtyq forým ótip jatyr, dep habarlaıdy «QazAqparat» HAA tilshisi.
Aımaqtyq forýmdy Qazaqstandaǵy Ulybrıtanııa elshiligi uıymdastyryp otyr. Eýropa tórindegi damyǵan eldiń elshiligi sol memlekette teleradıo habaryn taratatyn jetekshi «Thomson Foundation» uıymyn sharaǵa arnaıy ákelgen. Shara aıasynda Ulybrıtanııa men Ýkraına elderiniń tájirıbeleri negizinde baǵdarlamalardy jasaý, telearnalardy basqarý modelderi oqytylmaq. Jobanyń maqsaty - otandyq telearnalardyń ekonomıkalyq turǵydan tıimdi damýyn jolǵa qoıý, ınternetke boı úıretip bara jatqan telearnalardyń kórermenderin saqtap qalý, osy maqsatta jańalyq materıaldary men baǵdarlamalardyń sapasyn arttyryp, telearnalardyń ómirsheńdigine serpin berý bolyp otyr. Aımaqtyq telearnalardyń basshylary bas qosqan forýmdy «Thomson Foundation» uıymy qazaqstandyq «Quqyqtyq medıa-ortalyq» QQ-men seriktese ótkizýde.
«Aımaqtyq telearnalar nege tańdaldy? Óıtkeni, olardyń bir-birimen tájirıbe almasý múmkindikteri bola bermeıdi. Álemdik trendtterdi olarǵa da úıretý óte mańyzdy. Álemdik tájirıbe aınalyp kelgende aıtarlyqtaı shyǵyndy talap etpeıtinin bilýimiz kerek. Eń bastysy, ınternet nusqany telearnalardyń nusqasymen salystyra zerttep, televıdenıeniń tanymaldylyǵyn arttyrý joly kórsetiledi», - deıdi «Quqyqtyq medıa-ortalyq» QQ jetekshisi Dıana Okremova.
Ortalyq jetekshisi sonymen birge forýmnyń ótý mazmuny týraly týraly da aıtty.
«Bul joba 9 aıǵa arnalǵan. Shara aıasynda qazaqstandyq telekompanııalarǵa jańa tehnologııalardy oqytý, mobıldi jýrnalıstıkany qoldaný, aımaqtyq telekompanııalar úshin ınternettegi zamanaýı quraldardy qoldaný sekildi máseleler qaýzalady. Osy maqsatta sharaǵa Ulybrıtanııalyq VVS, ýkraınalyq 1+1 arnalarynyń sarapshylary kelip otyr», - deıdi Dıana Okremova.
Onyń aıtýynsha, forým jumysy aımaqtyq telearnlardyń jumysymen shektelip qalmaıdy.
«Ekinshiden, forým aıasynda memlekettik organdardyń baspasóz hatshylaryn oqytý máselesi qolǵa alynbaq. Baspasóz hatshylaryna aqparat taratý úshin áleýmettik jelilerdi qoldaný joldary boıynsha tájirıbeler kórsetiledi. Biz baspasóz hatshylarynyń jumysy shıraı túser degen oıdamyz. Óıtkeni, olarǵa tilshiler tarapynan der kezinde aqparatty bermeý sekildi kóptegen shaǵymdary aıtylyp jatatyny belgili», - deıdi ol.
