Astanada álemdik daǵdarystyń sabaqtaryna arnalǵan kitap jaryqqa shyqty
ASTANA. 18 qańtar. QazAqparat /Jasulan Joldybaev/ - Búgin Astanadaǵy Nazarbaev ýnıversıtetinde ekonomıka ǵylymdarynyń doktory, professor Arystan Esentúgelovtyń «Qubylmaly álemde eldi órkendetý strategııasy. Álemdik daǵdarystan alynǵan ǵıbrat jáne qazaqstandyq ekonomıkany jańǵyrtý» atty kitabynyń tusaýkeseri ótti.
«Bul kitap álemdik daǵdarystyń sabaqtaryna arnalǵan. Biz úshin daǵdarystyń shyǵý sebepteri men álemdik ekonomıkanyń onymen kúresýdiń qandaı ádisterin qoldandy, onyń Qazaqstanǵa áseri men faktorlary, el úkimetiniń qolǵa alǵan sharalardyń qanshalyqty tıimdi bolǵany qyzyqtyrdy. Bunyń barlyǵyn saralaý qajet boldy. Ol ekonomıkamyzdyń áli talaı bastan keshiretin osyndaı daǵdarystarda qoldaný úshin kerek», - deıdi professor.
Basylymnyń basty ereksheligi - eldiń naqty ekonomıkalyq tájirıbesi negizinde oı túıý, álemdik daǵdarys áserine toıtarys berýdiń tıimdi joldaryn usyný.
Avtor álemdik qubylystardy nemese úkimet jumysyn jıyntyq túrde tizbektep jazýmen ǵana shektelip qoımaǵan. Ol máseleniń túp-tórkinin izdeýge tyrysqan. Talqylap qana qoımaı, problemanyń sheshý joldaryn jáne onymen kúresýdiń tásilderin tizbektegen.
Onyń aıtýynsha, Qazaqstan daǵdarys jaǵdaıynda joǵary tehnologııalardy damytyp, syrtqy naryqtaǵy óziniń yqpalyn arttyrýy tıis.
«Bul kitapta álemdik shaqyrýlarǵa jaýap beretin jahandyq strategııa prıntsıpteri usynylǵan. Ol boıynsha Qazaqstannyń damýyna ashyq ekonomıka, ınnovatsııa jáne erkin kásipkerlik qajet», - dep túıindedi sózin professor.
«Ekonomıkalyq zertteý ınstıtýty» AQ-nyń qurmetti prezıdenti, «Ulttyq taldamalyq ortalyq» AQ dırektorlar keńesiniń múshesi A. Esentúgelov 200-den astam kitaptar men maqalalardyń, ǵylymı eńbekterdiń avtory.
