Astanada «Álem qadirlegen Elbasy» shetel memleketteriniń joǵary nagradalar kórmesi ashyldy (FOTO)
Kópshilik nazaryna alǵash ret Qazaqstan Respýblıkasynyń Prezıdenti N.Á. Nazarbaevqa berilgen shet memleketterdiń 39 joǵary nagradalary usynyldy.
Kollektsııada Ulybrıtanııa, Japonııa, Reseı, Vatıkan, Frantsııa, Aýǵanstan, Qytaı jáne basqa da elderden berilgen nagradalar qoıylǵan. Kórmeni Elbasy kitaphanasynyń atqarýshy dırektory Beısembaı Jumabekov ashty.
«Kórme Qazaqstan Respýblıkasynyń Tuńǵysh Prezıdenti kúnine arnalyp ashyldy. Bul nagradalar bizdiń Memleket basshysymyzdyń álem qaýymdastyǵynyń moıyndaǵanynyń belgisi bolyp tabylady. Búgingi kúnge Nursultan Ábishuly Nazarbaevqa 39 shetel nagradasy berilgen. Bul elder ony lıder retinde, Qazaqstandy kúshti el retinde moıyndady deýge bolady», - dedi Elbasy kitaphanasynyń atqarýshy dırektory Beısembaı Jumabekov kórmeniń ashylýynda. Saltanatty ashylý rásimine qatysqan Qazaqstan Respýblıkasy Ulttyq mýzeıiniń dırektory Darhan Myńbaı kórmeniń ereksheligine toqtaldy: - Búgingi kórmeniń biregeıligi sol, munda qoıylǵan ár medaldiń, ár ordenniń ózindik tarıhy bar. Ár nagrada - bul bizdiń Elbasymyzdyń uly eńbegi. Bizdiń Prezıdentimiz Qazaqstandy barsha álemge tanytty. Biz óz Prezıdentimizdi maqtan etýimiz kerek! Barshańyzdy kele jatqan Qazaqstan Respýblıkasynyń Tuńǵysh Prezıdenti kúnimen quttyqtaımyn! Prezıdent kúni - bul Elbasynyń elimizdiń qurylysy men órkendeý jolyndaǵy eńbegi úshin kórsetilgen qurmet bolyp tabylady. Sharaǵa sondaı-aq, jazýshy Ákim Tarazı, «Nazarbaev Zııatkerlik mektepteri» derbes bilim berý uıymynyń basqarma tóraıymy Kúlásh Shamshadınova, L.N. Gýmılev atyndaǵy Eýrazııa ulttyq ýnıversıtetiniń professorlary men oqytýshylary, Qazaq tehnologııa jáne bıznes ýnıversıtetiniń, Qazaqstandaǵy elshilikterdiń ókilderi, saıasat jáne qoǵamdyq qaıratkerler qatysty. Sondaı-aq, 26 qarashada «Qazaqstanda prezıdenttik ınstıtýttyń qalyptasýy men damýy» atty ınteraktıvtik kórme óz jumysyn bastady. Kórmeniń maqsaty - muraǵattyq qujattar arqyly prezıdenttik ınstıtýttyń qalyptasýymen Qazaqstan Respýblıkasynyń Táýelsizdiginiń nyǵaıýnyń negizgi kezeńderin kórsetý. Kórme birinshi qabatta atrıýmdaǵy úlken ekranda kórsetiledi. Kórme 2016 jyldyń 15 qarashasyna deıin jalǵasady.
