Astanada «ALEM CUP» halyqaralyq kórkem gımnastıka týrnırleriniń serııasy ótedi
ASTANA.KAZINFORM - Astanada jaqyn jáne alys shetelderden kelgen 1000-nan astam sportshynyń basyn qosatyn «ALEM CUP» halyqaralyq kórkem gımnastıka týrnırleriniń aýqymdy serııasy ótedi, dep jazdy qala ákimdiginiń resmı saıty.
Іs-shara joǵary deńgeıdegi jarystardy ótkizýge tolyq sáıkes keletin Qazaqstan Athletics sport kesheniniń bazasynda uıymdastyrylady.
Týrnırler serııasy myna tártippen ótedi:
1. «FIG ALEM CUP» – 8, 9, 10 naýryz. Jarysqa Qazaqstan, Italııa, Kıpr, Sırııa, Kanada jáne Qyrǵyzstan elderinen 60-tan astam lıtsenzııalanǵan gımnast qatysady. «FIG ALEM CUP» – Halyqaralyq gımnastıka federatsııasynyń (FIG) resmı lıtsenzııasy bar sportshylar baq synaıtyn halyqaralyq deńgeıdegi týrnır. Jarys ulttyq quramalardyń úzdik ókilderin biriktirip, sporttyq dıplomatııa men halyqaralyq yntymaqtastyqty nyǵaıtatyn mańyzdy alań sanalady. Týrnırdiń saltanatty ashylý rásimi 8 naýryzda ótedi.
2. «ALEM CUP» respýblıkalyq týrnıri – 9 jáne 10 naýryz. Bul jarysqa Qazaqstan Respýblıkasynyń 200-den astam gımnasty, sport sheberleri baǵdarlamasy boıynsha qatysady. Respýblıkalyq týrnır – joǵary dárejeli sportshylar úshin negizgi ulttyq alańdardyń biri ári el quramasynyń kadrlyq rezervin qalyptastyrýǵa yqpal etedi. Saltanatty ashylýy – 9 naýryz.
3. «ASTANA CUP» jáne «ALEM BABY CUP» halyqaralyq týrnırleri – 7 jáne 8 naýryz. Atalǵan jarystarǵa Izraıl, Reseı, Kanada, Portýgalııa, Armenııa jáne Qazaqstan elderinen shamamen 800 gımnast qatysady.
Týrnırler barlyq jas sanatyn qamtıdy – eń jas qatysýshylardan bastap joǵary razrıadtaǵy sportshylarǵa deıin, onyń ishinde alǵashqy jarysyna qatysatyn gımnastar da bar. Bul básekeler buqaralyq sportty damytýǵa, kórkem gımnastıkany keńinen nasıhattaýǵa jáne halyqaralyq sporttyq baılanystardy nyǵaıtýǵa baǵyttalǵan.
Týrnırler serııasy Týrızm jáne sport mınıstrliginiń, Astana qalasynyń Dene shynyqtyrý jáne sport basqarmasynyń, Qazaqstannyń Ulttyq gımnastıka federatsııasynyń jáne qalalyq gımnastıka túrleri federatsııasynyń qoldaýymen ótedi.
«ALEM CUP» týrnırler serııasy – kórkem gımnastıkany damytýǵa jáne Qazaqstannyń halyqaralyq jarystar ortalyǵy retindegi ımıdjin nyǵaıtýǵa baǵyttalǵan mańyzdy halyqaralyq sporttyq is-shara.
Aıta keteıik, fýtboldan Qazaqstan áıelder quramasy álem chempıonaty irikteý kezeńin bastaıdy.