Astanada «Álem boıaýlary» flesh-mobyna 800 bala qatysty
ASTANA. QazAqparat - Astanada sýly-jasyl jelek alańynda «Álem boıaýlary» atty flesh-mob ótikizildi. Sharaǵa qatysýshylar «Juldyzaı» festıvaliniń ánuranyn dene qımyldarymen, ymdap oryndady.
Bul týraly astana.kz saıtyna shara barysynda málim boldy.Flesh-mobqa Qazaqstannyń túkpir-túkpirinen jınalǵan 800 bala qatysty. Uıymdastyrýshylardyń aıtýynsha, sonyń ishinde 300-i múmkindigi shekteýli bala bolsa, 500-i festıvalǵa qatysýshylarǵa qoldaý kórsetken elordalyq stýdentter men oqýshylar.
«Álemde osy sııaqty flesh-mob ótkizilgen emes. Byltyr da osyndaı shara uıymdastyrylǵan bolatyn. Oǵan 600 adam qatysqan, al bıyl rekord ornatqymyz keldi, oıymyz iske asty. Flesh-mobtyń maqsaty qoǵam nazaryn erekshe balalarǵa aýdarý. Bári olardy «múmkindigi shekteýli jandar» dep ataýdy ádetke aınaldyrǵan, al menińshe, bul - «múmkindigi erekshe jandar». Óıtkeni bizdiń balalar eshteńeden de shektelip otyrǵan joq. Olar baqytty, óte daryndy», - dedi sharanyń qoıýshy rejısseri Baqytjan Tajınov.
Atalǵan shara toǵyzynshy ret ótkizilgen jyl saıynǵy «Juldyzaı» festıvali aıasynda uıymdastyryldy. Búginde bul - múmkindigi shekteýli balalar shyǵarmashylyǵyna arnalǵan jalǵyz festıval.
«Festıval 7 atalym boıynsha ótkizildi: vokal, aspapta oryndaý, ymmen óleń aıtý, horeografııa, beıneleý jáne qoldanbaly óner jáne «Álem meıirimdiligi» áleýmettik rolıgi», - dedi «Juldyzaı» korporatıvtik qorynyń dırektory Gúlhan Isabaeva.
«Munda múmkindigi shekteýli balalar ózderiniń qabilettilikterin iske asyrýǵa kóp kúsh jumsaıdy, ózderiniń shyǵarmashylyqtaǵy, mýzykadaǵy jáne ónerdegi daryndylyǵyn pash etý múmkindigine ıe bolady. Jyl saıyn festıvalǵa qatysýshylar barsha Qazaqstannan jınalady», - deıdi uıymdastyrýshylar.
Festıvaldiń jabylýy men jeńimpazdardy marapattaý rásimi 1maýsymda «Qazaqstan» ortalyq kontsert zalynda saǵat 15.00-de «Juldyzaı-2014» gala-kontsertinde ótedi.
