Astanada aldaǵy úsh jylda 6 mektep pen 8 balabaqsha salynady
ASTANA. 13 aqpan. QazAqparat -Astanada A.Baıtursynov kóshesi, M.Jumabaev dańǵyly jáne «Ýdarnık», «Mıchýrınets» saıajaı kooperatıvteri aýmaǵynda jańa mektepter men balabaqsha salynatyn bolady.
Bul týraly Astana qalasynyń resmı saıty Qurylys basqarmasyna silteme jasap habarlady.
Bıylǵy jyly atalǵan aýdanda birqatar mektepter salý qarastyrylǵan. Atap aıtqanda: № 41 jáne Mırzoıan kósheleriniń qıylysynda 1200 oryndyq mektep, №50 jáne Sh.Qaldyaıaqov kósheleriniń ońtústigine qaraı 1200 oryndyq mektep, sondaı-aq Saraıshyq kóshesiniń ońtústigi men M.Jumabaev dańǵylynyń shyǵysyna qaraı 1200 oryndyq mektep salynady.
Al 2015 jyly A.Baıtursynov kóshesi boıynda M.Jumabaev dańǵylynyń batysyna qaraı 1200 oryndyq, Mırzoıan kóshesi men Nájimedenov kóshesiniń qıylysynda 1200 oryndyq (jobalanǵan) jáne 41a kóshesi men Jumabaev dańǵylynyń shyǵysyna qaraı (jobalanǵan) mektepter salynatyn bolady.
Balabaqshalarǵa keletin bolsaq olar - 2013 jyly Aınakól men Mırzoıan kósheleriniń qıylysynda (240 oryndyq), Aınakól kóshesi men M.Jumabaev dańǵylynyń qıylysynda (240 oryndyq), sondaı-aq, J.Nájimedenov jáne Mırzoıan kósheleriniń qıylysynda( 240 oryndyq) salynatyn bolady.
Al 2014 jyly balabaqshalar A.Baıtursynov kóshesi men M.Jumabaev dańǵylynyń shyǵysynda (jobalanǵan) jáne Mırzoıan kóshesi men A.Baıtursynov kósheleriniń qıylysynda salynbaq.
2015 jyly mektepke deıingi mekemelerdi M.Jumabaev dańǵyly men Sh.Qaldyaıaq kósheleriniń qıylysynda (jobalanǵan), 41a kóshesi men M.Jumabaev dańǵylynyń shyǵys bóliginde (jobalanǵan), sondaı-aq Saraıshyq kóshesiniń ońtústigi men M.Jumabaev dańǵylynyń batys bóliginde salý josparlanǵan.
