Astanada aldaǵy bes jylda 24 mektep salynady
ASTANA. QazAqparat - Jańa oqý jylyna oraı Astana ákimdigi qala mektepteri týraly tsıfrlyq málimetterdi jarııalady, dep habarlaıdy QazAqparat.
Ákimdiktiń habarlaýynsha, búginde Astanada 105 orta bilim mekemesi bar, onyń 85-i memlekettik, 1 - keshki, 15 - jekemenshik jáne tórteýi - respýblıkalyq mańyzy bar mektepter.
«Jańa oqý jylynda Astana mektepterine 160 myń oqýshy bardy, onyń arasynda 18 myń birinshi synyp oqýshysy bar. Maýsymaıynan bastap, 1 synypqa qabyldaý úshin elektrondy jáne qaǵaz júzinde 16 myńnan astam ótinish tirkeldi», - delingen ákimdiktiń resmı habarlamasynda.
Sonymen birge ákimdik Astanada salynatyn jańa mektepter jóninde baıandady.
«2018 jyly - 8 mektep jóndeýden ótse, sońǵy 4 jylda 22 bilim bilim berý ordasynda kúrdeli jóndeý jumystary júrgizildi. Aldaǵy 5 jylda Astanada 24 mektep pen 10 qosymsha ǵımarat qurylysy josparlanyp otyr, sondaı-aq 50 myń oryndy qamtıtyn jekemenshik mektepter ashý kózdelgen. Bul qadamdar úsh aýysymdy máseleni sheshýge kómektesedi», - dep habarlady elorda ákimdigi.
Oqý ǵımarattarynda balalarǵa qolaıly jaǵdaı jasaý úshin jańa oqý jylynda 42 mektepte aýyz sý fontany, 13 mektepte bastaýysh synyp oqýshylary úshin jeke shkaftar ornatylǵan.
«Mektepter robototehnıka kabınetterimen, kompıýterlik, ınteraktıvti jáne STEM zerthanalarymen jabdyqtalady, árbir synypqa Wi-Fi jelisi ótkiziledi. Qaǵazben baılanysty jumystardy qysqartý maqsatynda, elektrondy jýrnaldar men kúndelikter júıesi engiziledi. Ata-analar men pedagogtar úshin osy jyldan bastap uıaly qosymsha jumys isteıdi», - deıdi ákimdiktiń baspasóz qyzmeti.
