Astanada alaıaqtyqpen aınalysqan «Call-ortalyq» uıymdastyrýshylary ustaldy

ASTANA. KAZINFORM – Astana qalasy prokýratýrasynyń úılestirýimen quqyq qorǵaý organdary «qara zere maıy» atty bıologııalyq belsendi qospalardy (BBQ) satý jáne «avtokólik utysy» týraly jalǵan aqparat taratý arqyly azamattarǵa jappaı qońyraý shalýmen aınalysqan zańsyz Call-ortalyqtyń qyzmeti toqtatyldy.

Astana qalasy prokýratýrasy málimetinshe, alaıaqtar Instagram jáne TikTok platformalary paıdalanýshylarynyń klıenttik bazasyn qoldanyp, qońyraý shalǵan.

Operatorlar azamattardy avtokólik utyp alǵany jóninde jalǵan aqparatpen aldap, olardan tirkeý men kedendik tólemderdi tóleý syltaýymen 150 myńnan 300 myń teńgege deıin aqsha talap etken.

Jedel-izdestirý is-sharalary barysynda barlyǵy 14 adamnyń qylmysqa qatysy bary anyqtaldy. Olar – dırektor, zańger, satý bóliminiń basshysy men operatorlar. Tintý barysynda 32 noýtbýk pen 10 uıaly telefon tárkilendi.

Qylmystyq shemanyń eki uıymdastyrýshysy ýaqytsha ustaý ızolıatoryna qamaldy. Jalpy keltirilgen zalal – 3,5 mln teńge.

Qylmystyq is máni boıynsha qaraý úshin sotqa joldandy.

- Astana qalasynyń prokýratýrasy azamattardy áleýmettik jelilerdegi kúmándi utystarǵa senbeýge shaqyrady. Bótenniń múlkin jymqyrý nemese aldaý nemese senimdi teris paıdalaný jolymen bóten múlikke quqyqty ıemdený alaıaqtyq retinde tanylady jáne bul áreket úshin on jylǵa deıingi merzimge bas bostandyǵynan aıyrý jazasy qarastyrylǵanyn eske salamyz, - delingen habarlamada.

SQO-da alaıaqtar sanepıdqyzmettiń atyn jamylyp, kásipkerlerdi bopsalaıtynyn jazǵan bolatynbyz.