Astanada alaıaqtarǵa kómek kórsetken «dropperler» toby áshkerelendi

ASTANA. KAZINFORM — Astana qalasy prokýratýrasynyń úılestirýimen quqyq qorǵaý organdary Qazaqstan Respýblıkasynyń sheginen tys jerde áreket etken alaıaqtarǵa kómek kórsetken «dropperler» tobynyń is-áreketin áshkereledi. 

Anyqtalǵandaı, 2025 jylǵy 5-7 aqpan aralyǵynda shetelde ornalasqan alaıaqtar «Call-ortalyq» uıymdastyryp, IP-telefonııany paıdalana otyryp, Qazaqstan azamattaryna qońyraý shalǵan. Olar ózderin memlekettik mekemelerdiń qyzmetkerleri retinde tanystyryp, azamattardy kúmándi aqshalaı aýdarymdar týraly jalǵan aqparatpen aldap, qarajatty Ulttyq banktiń «qaýipsiz» shottaryna aýdarýǵa kóndirgen.

— Aqshany qolma-qol shyǵarý úshin Qazaqstannyń tórt azamatyn tartqan, onyń ishinde kámeletke tolmaǵandar anyqtaldy. Olardyń ishinen ekeýi syıaqy úshin ózge tulǵalardyń atyna resimdelgen bank kartalaryn izdestirgen. Bireýi kartalardy alyp otyrǵan, al ekinshisi bankomattar arqyly aqshany sheship otyrǵan. Qolma-qol qarajat kýratorlarǵa berilip, olar óz kezeginde uıymdastyrýshylardyń nusqaýy boıynsha aqshany krıptovalıýtaǵa aýystyratyn tulǵalardyń shottaryna aýdaryp otyrǵan, — delingen habarlamada.

Atalǵan alaıaqtyq júıe saldarynan 7 adam zardap shekken, materıaldyq shyǵyn 5,5 mln teńgeden asty.

Barlyq aıyptalýshy sotqa berildi.

Astana qalasynyń prokýratýrasy — bótenniń múlkin jymqyrý nemese aldaý, sondaı-aq senimdi teris paıdalaný jolymen bóten múlikke quqyqty ıemdený — ıaǵnı alaıaqtyq jasaǵany úshin múlki tárkilenip 10 jylǵa deıin bas bostandyǵynan aıyrý túrindegi qylmystyq jaýapkershiliktiń kózdelgenin eske salady.

Aıta ketelik Aqtóbede sport mektebiniń jattyqtyrýshysy alaıaqtyq jasaǵany úshin sottaldy.