Astanada alaıaq áıel páter satyp alýshylardyń 50 mln teńgesin qoldy etken
ASTANA. QazAqparat - 2015-2016 jyldary Ý. esimdi azamatsha óz tanystarynyń arasynda Astananyń sol jaǵalaýynda ornalasqan «Novyı mır», «Nursaıa-1» sekildi turǵyn úılerdegi elıtaly páterlerdi naryqtaǵy baǵadan tómen somada zańdy túrde satyp alýdyń múmkin ekendigi týraly aqparat taratqan.
Bul týraly búgin Astana qalalyq sotynyń baspasóz qyzmeti habarlady. Osylaısha, sottalýshy alaıaqtyq jasap, 18 zardap shegýshiden jalpy somasy 53 605 760 teńgeni quraıtyn aqshany jymqyrǵan.
Astana qalasyndaǵy №2 Esil aýdandyq sotynyń 2017 jyldyń 21 aqpanyndaǵy úkimimen, Ý. esimdi azamatsha bótenniń úlken kólemdegi múlkin alaıaqtyqpen ıemdengeni úshin jáne senimge qııanat jasaǵany úshin kináli dep tanyldy. Onyń múlki tárkilenip, 6 jyl 8 aıǵa bas bostandyǵynan aıyryldy.
Qazaqstan Respýblıkasynyń «QR Táýelsizdiginiń 25 jyldyǵyna oraı raqymshylyq jasaý týraly» Zańyna sáıkes jáne kámelettik jasqa tolmaǵan 5 balasynyń bary eskerilip, jazasyn óteý merzimi jartylaı qysqartyldy. Onyń múlki tárkilenip, jalpy rejimdegi túzetý kolonııasynda 3 jyl 4 aı bas bostandyǵynan aıyrý jazasy kesildi.
Sottyń úkimi zańdy kúshine engen joq.
