Astanada alaıaq 50-ge jýyq adamnyń atynan onlaın nesıe rásimdegen
NUR-SULTAN. QazAqparat – Polıtsııa qyzmetkerleri uzaq ýaqyt boıy elorda turǵyndaryna ınternet-resýrs arqyly onlaın nesıe rásimdep júrgen 40 jastaǵy azamatty ustady, dep habarlaıdy QazAqparat Nur-Sultan qalalyq polıtsııa departamentiniń baspasóz qyzmetine silteme jasap.
Alaıaq jalǵan jolmen qarjy uıymdarynan elorda turǵyndarynyń jeke málimetterin alyp, onlaın qaryz rásimdep otyrǵan. Ol jeke málimetterdi paıdalana otyryp zardap shekkenderdiń tirkeý jazbasyna qol jetkizip, keıin nesıe retinde túsken aqshany vırtýaldy karta jáne elektrondy ámııan arqyly shyǵaryp alyp otyrǵan.
Osylaısha turǵyndardyń atyna ózderi bilmegen nesıe tirkele bergen. Qazirgi ýaqytta alaıaqtyń áreketinen 50-ge jýyq turǵynnyń zardap shekkeni anyqtaldy.
Polıtsııa qyzmetkerleri tergeý barysynda onyń IP-mekenjaıyn anyqtap, tutqyndady.
Qylmysker tergeý ızolıatoryna jabyldy. Oǵan qatysty QR QK 190-baby (aqparattyq júıeni paıdalanýshyǵa qatysty alaıaqtyq) boıynsha qylmystyq is tergelip jatyr.
Tulǵa alaıaqtyq úshin birneshe ret sottalǵan. Keıingi ret ol 2 jyl buryn qamaýǵa alynyp, eki jylǵa bas bostandyǵynan aıyrylǵan bolatyn. Sabaq almaǵan ol, qylmys jasaýyn toqtatpaǵan.
Nur-Sultan qalalyq polıtsııa departamenti turǵyndardy anonımdi ınternet-resýrstarda jeke málimetterdi taratpaýǵa jáne olardy messendjer arqyly eshkimge jibermeýge shaqyrady.
Tekserilgen, senimdi ınternet-portaldardy ǵana paıdalanǵan jón.
