Astanada Alash jáne Alash Orda tarıhyna arnalǵan muraǵattyq qujattar kórmesi ótedi
ASTANA. 21 qarasha. QazAqparat - 21 qarasha kúni Astana qalasynyń Muraǵattar jáne qujattamalar basqarmasy
«Alash jáne Alash Orda tarıhy - muraǵat qujattarynda» atty taqyryppen halyqaralyq ǵylymı-tájirıbelik konferentsııa ótkizedi. Atalǵan shara Alash Orda úkimeti qurylýynyń 95 jyldyǵyna arnalyp otyr.
Muraǵattardan tabylǵan qujattardyń negizinde Qazaqstan ǵylymdary, tarıhshy-muraǵatshylar, sondaı-aq Omby, Tomsk qalalarynan kelgen áriptester negizgi baıandamalar jasaıdy.
Konferentsııa aıasynda «Alash arystary» biregeı fotoderekti kórme uıymdastyrylady. Qazaqstan men Reseı Federatsııasy muraǵattyq mekemeleriniń birlesken kúsh-jigeriniń arqasynda Qazaq zııalylary tańdaýly ókilderiniń ómiri men qyzmeti týraly buryn kópke málim bolmaı kelgen qujattar alǵash ret kópshilik nazaryna usynylatyn bolady.
Konferentsııaǵa ǵylym salasynyń kórnekti qaıratkerleri, L.Gýmılev atyndaǵy Eýrazııa ulttyq ýnıversıtetiniń, QR BǴM Ǵylym komıteti Memleket tarıhy ınstıtýtynyń ǵalymdary, Qazaqstan Respýblıkasynyń Ulttyq muraǵatynyń, Ulttyq akademııalyq kitaphanasynyń, Reseı Federatsııasynyń Qazaqstan Respýblıkasyndaǵy Elshiliginiń, QR-daǵy Tatarstan, Bashqurtstan Elshiligi ókilderiniń jaýapty qyzmetkerleri jáne basqalar shaqyrylyp otyr.
