Astanada Alash avtonomııasynyń 100 jyldyǵyna oraı halyqaralyq konferentsııa ótedi

ASTANA. QazAqparat - 10 qarasha kúni Elordadaǵy EKSPO Kongress ortalyǵynda Alash avtonomııasynyń 100 jyldyǵyna arnalǵan «Rýhanı jańǵyrý: Alash jáne azattyq ıdeıasynyń sabaqtastyǵy» atty halyqaralyq ǵylymı-tájirıbelik konferentsııa ótedi, dep habarlaıdy «QazAqparat» HAA tilshisi QR BǴM baspasóz qyzmetine silteme jasap.

Halyqaralyq jıynǵa tanymal qoǵam qaıratkerleri, Parlament depýtattary, Qazaqstannyń barlyq óńirlerinen jáne alys-jaqyn shet elderden kelgen alashtanýshy ǵalymdar men tarıhshylar, ǵylymı jáne shyǵarmashylyq zııaly qaýym ókilderi qatysady. Elbasynyń tapsyrmalaryn iske asyrý aıasynda uıymdastyrylǵan halyqaralyq ǵylymı-tájirıbelik konferentsııa Alash avtonomııasynyń ǵasyrlyq mereıtoıyna oraı jyl basynan beri elimizdiń barlyq aımaqtarynda ótkizilgen túrli deńgeıdegi is-sharalardyń eń aýqymdysy bolmaq.

«Konferentsııa Plenarlyq májilis otyrysynan bastalyp, «1917 jylǵy Reseı tóńkeristeri jáne Alashorda», «Alashorda saıası tuǵyrnamasynyń jańashyl ıdeıalary: damýy men iske asýy» atty  sektsııalyq basqosýlarǵa ulasady. Onda ǵalymdar tarapynan «Rýhanı jańǵyrý» baǵdarlamasy aıasynda tarıhı murattar sabaqtastyǵy zerdelenip, Alash qozǵalysy músheleriniń azattyq jolyndaǵy kúresi men ulttyq biregeılik jolyndaǵy eńbekterine tarıhı baǵa berilmek», - dep habarlandy QR BǴM baspasóz qyzmetinen.

Jıyn sońynda Alash arystaryn ulyqtaý, olardyń muralaryn zertteýdi júıelep, Alash murattaryn urpaq sanasyna sińirý máseleleri kórinis tapqan qarar qabyldanbaq.