Astanada alabaı tuqymdy ıt balany qapty
NUR-SULTAN. QazAqparat – Elordada alabaı tuqymdy ıt tórt jasar balany qaýyp aldy, dep habarlaıdy QazAqparat astanalyq Polıtsııa departamentiniń baspasóz qyzmetine silteme jasap.
«12 tamyz kúni aýlada oınap júrgen 4 jasar balaǵa alabaı tuqymdy ıt shabýyl jasady. Balanyń búkil denesinde jáne basynda ıt tisiniń izi qalǵan. Qan-josa bolǵan balaǵa shuǵyl medıtsınalyq kómek kórsetý qajet boldy. Uldyń ákesi ýaqyt joǵaltpaý úshin aýrýhanaǵa óz kóligimen aparǵan. Bul ýaqytta qarańǵy túsip, jolda kólik kóbeıgen. Er adam Respýblıka dańǵyly men Bógenbaı batyr kóshesiniń qıylysynda turǵan patrýldik polıtsııa kóligine baryp, kómek suraǵan», - delingen habarlamada.
Patrýldik polıtsııa qyzmetkerleri leıtenant Asan Qomanov jáne serjant Eldos Júnisov 12 saǵattyq aýysymyn aıaqtap, bazaǵa kele jatqan. Sol sátte jaraqat alǵan balasy bar júrgizýshi olardan kómek suraǵan. Departamenttiń baspasóz qyzmeti habarlaǵandaı, polıtseıler «jasyl dáliz» uıymdastyryp, zardap shekken balany Qoshqarbaev kóshesindegi №2 qalalyq aýrýhanaǵa jetkizgen.
Zardap shekken balanyń ákesi Aleksandr Balahtyń aıtýynsha, polıtseılerdiń kómegimen aýrýhanaǵa jyldam jetip, balaǵa der kezinde medıtsınalyq járdem kórsetildi. Qazir bala em qabyldap jatyr, onyń jaǵdaıy turaqty. Erteńgi kúni Aleksandr Balah Patrýldik polıtsııa polkiniń basshylyǵyna baryp, jeke quram aldynda qol ushyn sozǵan polıtseılerge alǵys aıtty.
