Astanada alabaı ıti áıeldi talaı jazdady
NUR-SULTAN. QazAqparat - Ulandyq sarbazdar áıeldi qutyrǵan ıtten qutqardy, dep habarlaıdy QazAqparat Ulttyq ulannyń baspasóz qyzmetine silteme jasap.
Oqıǵa 18 qazan kúni saǵat keshki 21.40 kezinde Nur-Sultan qalasy Jumabaev dańǵylynda bolǵan.
«Qoǵamdyq tártipti kúzetip júrgen ulandyqtar kómekke shaqyrǵan daýysty estıdi. Aǵa leıtenant Azamat Túshkenov qaramaǵyndaǵy jaýyngerler Іlııas Omar, Almaz Batyrǵulov jáne Daler Qabdylqaqovty ertip, daýys shyqqan jaqqa dereý bet aldy. Jaqyndaǵanda-aq arsyldaǵan ıttiń daýsy estildi. Rasynda alabaı úlken tóbet áıeldi talap jatyr eken. Áskerıler shuǵyl túrde kúsh qoldanyp, jábirlenýshini arashalap qaldy» delingen habarlamada.
Jamandyqqa jol bermeı, der kezinde kómekke kelgen ulandyqtarǵa azamatsha rııasyz alǵysyn jetkizip, rahmet aıtty.
