Astanada «Ál-Farabı men Konfýtsıı: Uly oıshyldar suhbaty» monýmenti ashyldy
ASTANA. KAZINFORM — Elordada «Ál-Farabı men Konfýtsıı: Uly oıshyldar suhbaty» monýmentiniń saltanatty ashylý rásimi ótti.
Eki uly oıshyldyń beınesi somdalǵan erekshe músinniń avtory — belgili qytaılyq músinshi, Qytaıdyń Ulttyq kórkemóner murajaıynyń dırektory Ý Veıshan.
Memleket basshysyna tartý etilgen týyndy keıin Astana halyqaralyq ýnıversıteti janyndaǵy Beıjiń til jáne mádenıet ýnıversıtetiniń fılıalyna tabystaldy.
Astana halyqaralyq ýnıversıtetiniń prezıdenti Serik Irsalıevtiń aıtýynsha, músindi Qytaı tarapy Memleket basshysy Qasym-Jomart Toqaevqa Qytaıǵa jasaǵan resmı sapary kezinde syıǵa tartqan.
— Bul músindi Qytaıdaǵy áriptesterimiz Qasym-Jomart Kemeluly Toqaevqa Qytaıǵa jasaǵan resmı sapary kezinde syıǵa tartqan. Memleket basshysy óz kezeginde týyndyny bizge tartý etýdi uıǵardy. Bul — biz úshin úlken mártebe. Sonymen qatar stýdentterge sapaly bilim berýge degen jaýapkershilikti arttyrady, — dedi Serik Irsalıev.
Monýmenttiń jamylǵysyn QR Ǵylym jáne joǵary bilim mınıstri Saıasat Nurbek pen Qytaı Halyq Respýblıkasynyń Qazaqstandaǵy Tótenshe jáne ókiletti elshisi Han Chýnlın saltanatty túrde ashty.
Han Chýnlın bul týyndyny Qazaqstan men Qytaı arasyndaǵy órkenıettik jáne rýhanı baılanystyń sımvoly dep baǵalady.
— Joǵary kórkemdik sheberlik pen tereń fılosofııalyq mazmundy boıyna sińirgen bul týyndy — Qytaı men Qazaqstan órkenıetteriniń ózara baıanynyń, sondaı-aq keńistik pen ýaqytty eńsergen adamzat danalyǵynyń rýhanı toǵysýynyń jarqyn sımvoly, — dedi Han Chýnlın.
Músindik kompozıtsııa Qazaqstan men Qytaı arasyndaǵy mádenı jáne bilim berý baılanystarynyń sabaqtastyǵyn kórsetedi. Sondaı-aq ol Shyǵys oıshyldarynyń murasyna degen qurmetti bildiredi.
— Ál-Farabı — murasy qazaq jeriniń rýhanı qazynasyna aınalǵan uly oıshyl. Al Konfýtsıı — qytaı fılosofııalyq dástúriniń negizin qalaýshy ári Qytaıdyń rýhanı mádenıetiniń sımvoly. Búginde olardyń músinderiniń qatar turýy eki dananyń suhbatyn ǵana emes, Qazaqstan men Qytaı órkenıetteriniń tereń rýhanı úndestigin de beıneleıdi, — dedi Beıjiń til jáne mádenıet ýnıversıtetiniń vıtse-prezıdenti, professor Chjan Baotszıýn.
Saltanatty sharadan keıin qonaqtar Astana halyqaralyq ýnıversıtetin aralap, oqý ornyndaǵy óner murajaıymen tanysty.
Ǵylym jáne joǵary bilim mınıstri Saıasat Nurbektiń aıtýynsha, búginde Qazaqstanda sheteldik jetekshi jáne zertteý ýnıversıtetteriniń 40-qa jýyq fılıaly jumys isteıdi. Solardyń biri — osydan eki jyl buryn elordada ashylǵan Beıjiń til jáne mádenıet ýnıversıtetiniń fılıaly.
Mınıstrdiń sózinshe, Qazaqstanda bilim alýǵa nıetti sheteldik stýdentterdiń sany jyl saıyn artyp keledi. Bıyl jańa oqý jylynda Qytaıdan shamamen 3 500 stýdent Qazaqstanǵa bilim alý úshin kelmek.
— Bul — buryn-sońdy bolmaǵan kórsetkish. Sonymen qatar Reseıden 2 500-ge jýyq, AQSh-tan 100-ge jýyq azamat Qazaqstanǵa bilim alýǵa keledi. Jalpy maqsatymyz — elimizde ashylǵan sheteldik jetekshi ýnıversıtetterdiń fılıaldary arqyly Qazaqstanǵa 100 myńǵa jýyq stýdent tartý, — dedi Saıasat Nurbek.
Aıta keteıik, jaqynda óskemendik sheber qazaq handary men batyrlarynyń aǵash músinderin jasady.
