Astanada aqyn Jeńis Qashqynovtyń týǵanyna 75 jyl tolýyna arnalǵan ádebı-sazdy eske alý keshi ótedi
ASTANA. QazAqparat - Astanadaǵy Ulttyq akademııalyq kitaphanada belgili aqyn, qazaq balalar ádebıetiniń negizin salýshylardyń biri, jýrnalıst, «Eren eńbegi úshin» medaliniń, Jýrnalıster Odaǵyny syılyǵynyń ıegeri, aýdarmashy, ulttyq radıojýrnalıstıkany damytýǵa eńbek sińirgen tulǵa Jeńis Qashqynovtyń 75 jyldyǵyna oraı «Erttep mindim óleńniń dúldúl atyn» atty ádebı-sazdy eske alý keshi ótedi, dep habarlaıdy QazAqparat.
Taǵylymdy sharaǵa elimizge belgili aqyn-jazýshylar men ǵalymdar Tólen Ábdik, Serik Turǵynbekuly, Nesipbek Aıtov, Kópen Ámirbek, Tursyn Jurtbaı, Serik Negımov jáne taǵy basqa zııaly qaýym ókilderi qatysady.
Mereıli kesh aıasynda Jeńis Qashqynovtyń «Taǵzym» jyr jınaǵynyń tusaýy kesiledi. «Alyptar men arystar», «Týǵan jerge tý tiktim», «Tórttaǵandar men egiz shýmaqtar», «Dastandar» atty 4 taraýdan turatyn kitapqa aqynnyń buryn jaryq kórmegen óleńderi qosa engizilgen. Jańa jyr jınaǵy «Profı-Medıa» baspasynyń demeýshiligimen jaryqqa shyqty.
Osyǵan deıin aqynnyń artynda qalǵan mol murasynyń arasynda saqtalyp kelgen belgili sazger Temiráli Baqtygereev ánin jazǵan Álıhan Bókeıhan, Álimhan Ermekov, Jaqyn Aqbaevtyń rýhyna arnap shyǵarylǵan «Úsh arys», sonymen birge sazyn Eskendir Hasanǵalıev jazǵan «Aqtoǵaıym - altynym» ánderi ónersúıer qaýym nazaryna alǵash ret usynylady.
Kesh erteń, 3 naýryz kúni saǵat 16-00-de QR Ulttyq akademııalyq kitaphanasynyń «Májilis» zalynda ótedi.
