Astanada aqyn Ońaıgúl Turjannyń «Teńizder de shóldeıdi» atty jyr keshi ótedi

O.Turjan L.N.Gýmılev atyndaǵy Eýrazııa ulttyq ýnıversıtetiniń jýrnalıstıka jáne saıasattaný fakýltetiniń dotsenti, Farıza Ońǵarsynova negizin qalaǵan «Tumar» jýrnalynyń bas redaktory, fılologııa ǵylymdarynyń kandıdaty, ǵalym-zertteýshi, aýdarmashy. Ol «Samal» (1987), «Sherqala» (1998), «Jyr-dala» (2001), «Teńizder de shóldeıdi» (2003), «Jyr kitaby» (2007) atty birneshe jyr jınaqtarynyń avtory. Qazaqstan Jazýshylar Odaǵynyń múshesi, Tólegen Aıbergenov atyndaǵy ádebı syılyqtyń laýreaty.

2012 jyly Táýelsizdigimizdiń 20 jyldyǵyna arnalyp ótkizilgen respýblıkalyq músháıranyń bas júldegeri.

London qalasynda osy jyldyń 23 sáýirinde aǵylshyn tiline aýdarylǵan O.Turjannyń bir top óleńderiniń tusaýkeseri ótti.

Óziniń mazmundy jyrlarymen respýblıkamyzǵa tanymal O.Turjannyń ǵylym salasynda da ózindik qoltańbasy bar. Onyń «Mahambet óleńderiniń poetıkasy» atty monografııasy ekinshi qaıtara basylyp shyqty. Sondaı-aq Ystambýl ýnıversıtetiniń professorlary Aıla jáne Aıdemır Okaımen birigip joǵary oqý oryndaryna arnalǵan «Jurtshylyqpen baılanys: negizgi uǵymdar, strategııasy men tájirıbeleri» atty oqýlyq jazyp, jaryqqa shyǵardy.

Ol aýdarma salasyna da qomaqty úles qosty. Sheteldik klassık-qalamgerler S.Tsveıg, Z.Freıd, V.Shoınka, G.Vasılev shyǵarmalaryn qazaq tiline aýdardy.

Aqyn shyǵarmashylyǵyna arnalǵan «Teńizder de shóldeıdi» atty jyr keshi azattyq taqyrybyna arnalǵan. Kesh dramalyq-sazdy sıpatta ótedi.

Kesh qonaqtary: Ábish Kekilbaev, Aıman Musahodjaeva, Qýanysh Sultanov, Ákim Tarazı, Nurlan Orazalın, Aqushtap Baqtygereeva bastaǵan aqyn-jazýshylar, QR Parlamenti Senaty men Májilisiniń depýtattary, Astana qalasy ákimdiginiń ókilderi, BAQ ókilderi jáne basqa da jyr súıer qaýym shaqyrylyp otyr.

Jadyra Shamuratova