Astanada aqyn A. Muhametqalıqyzynyń ádebı-shyǵarmashylyq keshi ótti

«Meniń óleńderimniń basty taqyryby adam men jaratylystyń arasyndaǵy baılanys. Adam tabıǵatynyń ózgerisi, ana men balanyń baılanysy», deıdi aqyn.

Aqynnyń týyp-ósken jeri Semeı óńiri bolǵandyqtan, polıgonnyń zardabyn kórgen analardyń, sal bop týǵan balalardyń densaýlyǵy týraly A. Muhametqalıqyzynyń «Qursaqsyz ana» atty poemasy jazylǵan. Bir áıeldiń taǵdyryna negizdelgen poema ádebıet álemine ákelgen tyń dúnıe dep baǵalanýda.

Astanaǵa kelgennen keıin A. Muhametqalıqyzy «Kindik tamyr» kesek shyǵarmasy basylyp, oqyrmanǵa jol tartty. Aqynnyń aıtýynsha, kez kelgen adamnyń týǵan jerinde kindik tamyry jerge baılanýy kerek. «Týyndynyń negizgi oıy qazir kindik qany jerge tambaǵan tamyrsyz urpaq tárbıelep jatqan joqpyz ba degenge saıady», deıdi shyǵarma avtory.

Aqynnyń aıtýynsha, onyń jastaıynnan jastanyp oqıtyn, pir tutatyn aqyny qazaqtyń klassıgi Abaı babamyz bolyp tabylady. Sonymen qatar lırıkanyń patshasy atanǵan Maǵjan Jumabaev, Muqaǵalı Maqataev, aqyn qyzdardyń basynda turǵan Farıza Ońǵarsynova, Marfýǵa Aıtqojına syndy sóz tarlandarynyń shyǵarmashylyǵy da aqyn kóńiline alabóten emes.

«Aqyn bolý - ol qaıratkerlik. Qoǵamnyń, halyqtyń, oqyrmandardyń oıyn dóp taýyp, shyǵarmasynda kórinis berýi qajet. Kez kelgen oqyrman óziniń oqyp otyrǵan dúnıesinen ózin taýyp alýy kerek. Aqynnyń sheberligi sonda bolsa kerek», deıdi A. Muhametqalıqyzy.

Búgingi keshke elordanyń aqyn-jazýshylary men A. Muhametqalıqyzynyń shyǵarmashylyǵyna qyzyǵýshylyq tanytqan kóp jas jetkinshek keldi. «Donor men tek», «Qursaqsyz ana», «Kindik tamyr», «Altynnyń býy», «Shákárim» atty 5 poemadan shaǵyn-shaǵyn úzindiler oqyldy.

Aqynnyń aıtýynsha, «bir bóten oıym bar» dep otyrǵany osy 5 dastanda baıandalǵan.

A. Muhametqalıqyzynyń tuńǵysh jyr jınaǵy 1999 jyly «Jansaıa» atty basylyp shyqqan. 2002 jyly «Jyr-ǵumyr» atty ekinshi jınaǵy jaryq kórdi.