Astanada aqyly turaqtyń baǵasy 150 teńge bolýy múmkin
ASTANA. QazAqparat - Búgin Astana qalasy Qoǵamdyq keńesiniń otyrysynda aqyly kólik turaqtary máselesi qaraldy. Belgili bolǵandaı, birinshi kezeń aıasynda sol jaǵalaýda kólikke arnalǵan 910 oryn qamtylady, bastapqyda joba testilik rejımde jumys isteıdi, dep habarlady qalalyq ákimdiktiń baspasóz qyzmetinen.
- Árıne, joba kezeń-kezeńmen engiziledi. Birinshi kezeńde sol jaǵalaýda kólik qoıatyn 910 oryn qamtylady. Bizdiń mindetimiz jobanyń jumys isteý qabilettiligin jáne ony odan ári júzege asyrý úshin qajetti barlyq tehnıkalyq kórsetkishterdi anyqtaý bolyp tabylady. Aqyly turaq - aqsha óndirip alý quraly emes, bul kóshe-jol jelisine túsetin júktemeni azaıtýdyń bir quraly, - dedi qalalyq Jolaýshylar kóligi basqarmasynyń basshysy Edil Súleımenov.
Onyń aıtýynsha, qazirgi kezde aqyly turaqty paıdalanǵany úshin bazalyq tarıfti bekitý týraly qaýly ázirlenip jatyr. Esepteýler boıynsha ol 182 teńgeni quraýy tıis, biraq áleýmettik mańyzdylyǵyn eskere kele, saǵatyna 150 teńgeden belgileý usynylyp otyr. Múgedektigi bar adamdar turaqty tegin paıdalanady.
Otyrys barysynda tólemniń tek kúndizgi ýaqytta ǵana alynatyny aıtyldy, al jobanyń ekinshi kezeńinde aqyly turaqtardyń janynda ornalasqan úılerdiń turǵyndaryna rezıdenttik ruqsattar berý qarastyrylady. Olar óz kólikterin tegin qoıa alatyn bolady.
Sonymen qatar, qoǵamdyq keńes otyrysy barysynda elordaǵa kirýdi aqyly etý múmkindigi máselesi qaraldy.
- Búgingi tańda qalada táýligine 400 myńǵa jýyq kólik tirkeledi, sondaı-aq, elordaǵa alty baǵyttan táýligine 74 myńǵa jýyq kólik keledi, bul kólik qoıý jaǵdaılaryn qıyndatyp, kólik keptelisterin jáne t.b. jaǵdaılardy týdyrady. Trafıkti eń tıimdi shekteýdiń joldarynyń biri qala kirýdi aqyly etý bolyp tabylady. Biz qala aýmaǵynda kóshelerdiń belgili bir ýchaskelerin aqyly qylýdy usynamyz, - dedi E. Súleımenov.
Naqty qaı ýchaskelerdiń aqyly bolatyny ázirge belgisiz. Qoǵamdyq keńes músheleri osy máselege qatysty kóp eskertý jasap, sógis aıtty. Osyǵan baılanysty aqyly turaqtar jobasy boıynsha Qosymsha qujattar, túsindirmeler, syzbalar suratyp, máseleni Qoǵamdyq keńestiń kelesi otyrysynda qaraý týraly sheshim qabyldandy. Qalaǵa kirýdi aqyly etý boıynsha eshqandaı qorytyndy shyǵarylǵan joq.
E. Súleımenov sondaı-aq, Astanadaǵy jolaýshylar kóliginiń jumysy týraly aqparatpen tanystyrdy.
- Qazirgi kezde 86 qalalyq marshrýttyń 64-i shyǵyndy bolyp keledi, 90 teńgelik tarıf 2014 jyly engizilgen, sáıkesinshe, eki jylda ekonomıkalyq jaǵdaı ózgerdi. Sondyqtan tarıfti kótermeý úshin sýbsıdııalaý kerek, - dedi ol.
Qoǵamdyq keńes músheleri sýbsıdııalaýdy qoldady. Aldaǵy eki jylda qoǵamdyq kólikpen júrý tarıfin burynǵy deńgeıde - 90 teńge mólsherinde qaldyrý josparlanǵan.
