Astanada aqyly turaqtyń aqshasyn tólemegenderdiń tizimi jasaldy
ASTANA. QazAqparat - Búginnen bastap Astanadaǵy aqyly turaqqa kóligin qoıyp, aqshasyn tólemeı ketken júrgizýshilerdiń tizimi jasala bastady, dep habarlaıdy QazAqparat «Astananyń kólik turaǵy keńistigi» JShS-na silteme jasap.
«Turaq aqysyn tólemegenderdiń tizimi 2888.kz saıtynda jarııalanǵan. Onda aqyly turaqqa kólikterin qoıyp, turaq aqysyn tólemeı ketken júrgizýshilerge tıesili kólikterdiń nómirleri kún saıyn jańartylyp turady», - delingen habarlamada.
Aıta keterligi, Astananyń turaq keńistigin basqarýdyń avtomattandyrylǵan júıesin engizý jónindegi jobanyń birinshi kezeńin júzege asyrý aıasynda 15 qańtardan bastap «Nurjol» jelekjolynda aqyly turaqtar jumys isteı bastaǵan. Atalǵan aımaqta 487 turaq oryny belgilenip, 12 parkomat ornatylǵan. Arnaıy jasalǵan taldaý kórsetkendeı, klıentter, turaq aqysyn mobıldik qosymsha júkteý jáne 2888.kz saıtyndaǵy jeke kabıneti arqyly tólegendi qolaıly sanaıdy.
Kompanııa ókilderi qalalyq ІІD-niń ákimshilik polıtsııasymen birlese otyryp, Nurjol jelekjoly boıynda ornalasqan aqyly kólik turaǵy aımaqtarynda ereje buzýshylardy anyqtaý úshin reıd ótkizdi.
Eki jarym aı ishinde aqyly turaqtar qyzmetin 3 myńnan astam kólik ıeleri paıdalanǵan. Alaıda júrgizýshilerdiń kópshiligi, kólikterin kommýnaldyq turaqqa qoıǵandary úshin aqy tólemeı nemese basqa, tyıym salynǵan jerlerge qaldyryp ketý arqyly bul aımaqqa kólik qoıý erejesin áli kúnge deıin buzyp keledi.
Eske sala ketsek, QR «Kólik quraldarynyń aıaldamasyn nemese turaqqa qoıý erejelerin buzý» ÁQtK 597-babyna sáıkes, turaq aqysyn tóleýden jaltarǵandarǵa úsh aılyq eseptik kórsetkish mólsherinde aıyppul salynady. Bir jyl ishinde osy ereje qaıta buzylsaa, aıyppul mólsheri 5 AEK bolady.
